IMPOSIBEL
Kòntròl riba tas di kompra
Buskando informashon tokante di e tópiko aki riba internèt nos a haña hopi diskushonnan i ponensianan diferente. “Si bo no tin nada di skonde, bo no mester wòri”. “Mi derechi di privasidat ta mas bálido ku e kòntròl”. “Si bo ninga laga kontrolábo bo ta sospechoso, kaminda tin huma tin kandela”. Echo ta ku kòntròl na kasa òf na porta di salida di un supermerkado, ta un práktika kontroversial di algun komersiantenan na rònt mundu i Kòrsou.
Pa hopi di nos, e kòntròlnan aki ta molèster riba nos lomba. Otro no ta laga e kos bai pa man. Echo ta ku kòntròl di tas ta un invashon di bo privasidat i ku bo por ninga esaki ku tur bo derechi. Sigur si e kontroladó ta wak bo di antemano ku kara manera ta ladron bo ta. No ta un prisòn bo ta drenta ni ta un pais den eksterior bo ta purba drenta. Ta un garoshi òf saku di produkto bo tin ku bo a tuma bo tempu kumpra i ku bo a paga nan ku bo sèn ku bo a traha duru pe. Lòs for di e pregunta kiko e efektividat di kòntròl ariba ariba di bo ta kompra ta enserá en realidat.
Si nos ta papiando di seguridat i kòntròl, lo bo a kere ku e negoshi tin su kámara di seguridat na e kasa i den su negoshi. Òf laga personal di seguridat kana rònt den e negoshi i vigilá klientenan sospechoso ku tin intenshon di hòrta. No por ta asina ku tur kumpradó ta bira víktima di un maneho di un negoshi pa kontrolá tur kumpradó komo si fuera nos tur ta drenta un negoshi ku intenshon di hòrta. Medidanan di seguridat no ta bal mas ku e derechi di privasidat personal di e konsumidó.