Kada konsumidó ta hopi importante pa e produktor lokal. Produkshon lokal no por eksistí sin personanan ku ta kumpra e produkto. Pues abo komo konsumidó tin influensia riba e ekonomia di Kòrsou.
Kada florin di e konsumidó ta konta. Komo habitante di nos isla lo ta bon pa nos kumpra produkto lokal konsientemente. Pa hasi esaki nos mester sa kua ta nos produktonan lokal. E manera tradishonal pa hasi kompra ta pa drenta supermerkado, negoshi òf tienda i kumpra loke nos mester segun preis òf kustumber. E plataforma ‘Made in Curacao’ ta kere ku e siguiente pasonan mester ta ku mas ku preis i kustumber nos mester wak si nos tin e opshon pa kumpra un produkto òf servisio lokal.
Kòrsou tin vários fábrika chikí i mas ainda nos tin hopi persona ku talento ku ta lora man òf asta hasiendo nan produkshon komo entrada pa nan i nan famia. Hopi bia e personanan aki no ta konosí ya komo ku merkadeo ta hopi karu pa un persona ku su pida negoshi chikí.
‘Made in Curacao’ ta sigur ku huntu nos tur por logra i ta pa esei nan tin e plataforma www.iammadein.com/curacao pa haña tur produkto, servisio i talento lokal. Huntu ku e wèpsait nan ta usa Medio Sosial manera FaceBook, LinkedIn, Twitter, Instagram etc ku e ophetivo pa yegá na mas persona /kliente potensial posibel pa nos produkshon lokal.
Hopi importante ta tambe e divisa ku e turista ta trese pa e durashon ku e ta bishita nos isla. Lo ke ta pone e sèn aki krese ta e eksperensia úniko ku e turista por tin. Si nos isla ta ofresé algu ku e ta gosa di dje i ku e no por haña otro kaminda, e turista aki lo bai konta su eksperensia i asina stimulá otronan pa bin wak kiko ta hasi Kòrsou asina úniko. Esaki ta mas oportunidat pa nos talentonan lokal bria.
Komo un plataforma ‘Made in Curaçao’ tin diferente otro kompania lokal afiliá na dje. Ku e plataforma aki 'Made i Curaçao' ta krea 1 kaminda sentral ku tur konsumidó por haña kasi tur produktor lokal.
Kuminsando for di e edishon aki, den e rúbrika Kompará i Kumpra, nos tei laga bo sera konosí ku diferente negoshinan/produktonan lokal. Ya asina abo komo konsumidó tin un bista di tur e diferente produktonan lokal optenibel serka nos propio hendenan.
PRODUKTONAN LOKAL
Bo sa kumpra
Ban selebrá nos hendenan.
Ban selebrá produktonan lokal!