Na final di kada aña ta momentu pa reflehá riba e aña ku ta kabando i tambe ta momentu pa fiha metanan nobo a e aña ku ta den porta. 2017 tabata un aña den kua nos komunidat a keda konfrontá ku kòntròlnan riguroso I konsistente di nos gobièrnu. Esaki ta akgu ku Fundashon pa Konsumidó ta aploudí I semper a boga pé. Ta un koinsidensia grandi ku den e prólogo di dezèmber 2016 di e revista aki nos a pone atenshon na seguridat di produkto i servisionan ku nos komo Konsumidó ta paga nos plaka ku nos a traha duru pé.
E kòntròlnan aki lástimamente a mustra tambe klaramente kon tiki nos tin reglá pa ku regulashonnan I eksihenshanan pa produktonan ku nos ta usa I konsumí. Ta fásil pa laga tur hende importá loke e ke I bende na e preis ku nan ke. Nos mester ta konsiente si di e implikashonnan di esaki. Kalidat inferior di kuminda por tin efekto grandi riba nos salubridat. Produktonan defisiente por ta un peliger grandi pa esun ku ta kumpra i us’é den konfiansa.
Nos a partisipá e aña aki na un kurso organisá pa Ministerio di Desaroyo Ekonómiko kaminda e tema tabata kon pa strukturá e proseso di pone norma pa un produkto òf servisio. Ki bo ta hasi? Adaptá un norma di un pais? Krea bo mes norma? Mirando ku nos ta importá for di diferente parti di mundo ku kisas ta tene nan mes na diferente norma, nos lo tin ku meskla i mira kiko ta mihá aplikabel pa nos isla. Mas importante ku tur ta ku nos mester tin e sensashon di urgensia pa pone prioridat na hisa seguridat di loke nos ta permit subi nos merkado akin a Kòrsou.
Fundashon pa Konsumidó den 2018 lo ekstendé su trabounan den e área di seguridat di produkto i lo kuminsá hasi investigashonnnan di kalidat di produktonan ku ta keda bendí na Kòrsou. Laga nos ban wak si loke ta pará riba e etikèt di e produkto ta meskos ku su kontenido. Si ta tuna tin den e blek’I tuna, si e awa no ta kontené bakterianan dañino òf si e fruta i bèrdura no ta pestá ku pestisida.
Editorial
PRÓLOGO
Subida di Prima
di Seguro Obligatorio
Marc Marshall
Direktor