E subida di e prima di seguro ku a keda anunsia pa minister di asuntunana ekonomiko, sin duda algun a kousa hopi diskushon. Nos a tuma nota di tur esakinan. Sinembargo, komo profeshonal nos tin e deber di bin ku propuestanan pa aportá posítivamente na e kousa. P’esei awe nos ke pone e asina yamá fondo di garantia, esta e ‘waarborgfonds’ den lus di e subida di prima di 13,5 %. Pa esnan ku no sa, den nos ordenansa nashonal ku ta regla responsabilidat sivil, esta LAM tin un artíkulo ku ta regla kasonan di daño kousá pa personanan sin seguro. Den e lei ei tin para ku esun ku sufri daño den un aksidente di trafiko na man di un persona no sigurá, por bini na remarke pa haña su daño kubrí ku plakanan di e fondo di garantia.
Hopi remarkabel ta si e echo, ku esnan konserní nunka a stòrt den e fondo aki, di manera ku e fondo no por funshoná manera lei ta stipulá. Semper nos a haña esaki algu masha lamentabel, pasobra ta hopi ta esnan ku ta haña na mes enbolbí den aksidente ku personanan ku no tin un seguro bálido. Sinembargo, den hopi kaso ta esun ku a sufri e daño mes tin ku kubri e gastunan, sin ningun konsekuensia finansiero pa e kousante. Asta e medidanan legal ku por keda tumá kontra di e kousante, tin bia no ta keda tumá kontra dje tampoko.
Pues ta parse ku esun ku semper ta sali mas perhudiká ta netamente esun ku fielmente sa di paga su seguro. Pa kolmo tin un fondo di garantia stipulá pa tempu kaba den lei, pa brinda alivio den kasonan kaminda e kousante di aksidente no tin seguro, pero ku ta inaktivo probablemente pa falta di plaka. Pesei awor ku gobiernu a anunsia e subidá di prima di seguro di 13,5 %, ta parse nos un bon momentu pa kuminsa usa partinan di e entradanan aki pa aktivá e fondo di garantia. Asina’ki esun ku sufri daño den trafiko, kousá pa un persona sin seguro, por haña su daño kubri konforme lei. Kisas ku esaki gobiernu lo por kompensá e subida di prima, ku ta parse drastikó pa hopi hende.
Artíkulo kortesia di abogado
Mr. Rainey Conquet