Balor di un
Durante di e último añanan krímen sibernetiko (kiermen via internet) a oumentá drástikamente. Esaki pa gran parti ta relatá na e echo ku uso di internet a bira parti di nos bida i di nos rutina diario. Algun ehèmpel di esaki ta: na trabou mas i mas empleadonan tin ku hasi uso di internet pa nan trabou, nos ta atendé ku nos kuentanan bankario online, nos ta kumpra kos online, sosialisá via internet etc. E echo ku nos ta hasiendo hopi uso di internet i spesialmente pa nos trabou i nos asuntunan privá ta hasi nos vulnerabel pa krimennan via internet.
CARICERT ta un organisashon di Bureau Telecommunicatie & Post ku ta enkargá ku e tarea pa ehekutá, koordiná i duna asistensia na momento di emergensia sibernetiko riba nivel nashonal na Kòrsou. CARICERT su meta prinsipal ta pa prevení insidentenan sibernetiko i mitigá e daño mas tantu posibel den kaso ku esaki sosodé tòg. Adishonalmente CARICERT ta traha riba e parti di konsientisashon di pueblo di Kòrsou en general tokante e importansia di seguridat sibernetiko.
Pa hasi e pueblo konsiente di e peligernan di uso internet i kua medidanan por tuma, CARICERT ta organisá kursonan di seguridat sibernetiko, kompartí informashon via e pagina di Facebook: curacaosafeonline òf via di publikashonnan manera esaki den e revista di fundashon pa konsumido kual ta dirigí na e públiko en general.
Meskos ku den nos bida diario nos komportashon mester ta korekto, nos mester pèrkurá pa nos komportashon riba internet tambe korekto.Ta hopi importante pa tur siudadano di Kòrsou ta na altura i konsiente di e seguridat sibernetiko pa evita ku nan ta bira víktima di atakenan sibernetiko dor di hasi uso di internet sin tuma e medidanan nesesario.
Pa e dianan di fiesta hopi hende ta hasi uso di internet pa kumpra nan produktonan di fin di aña, dus nan ta shòpnan online. CARICERT ta duna algun rekomendashon kon protehá nos mes kontra malechornan riba internet ora nos ta kumpra online durante e dianan di fiesta.
KRÍMEN SIBERNETIKO