NOTISIA
BO TABATA SA?
Segun investigashonnan di CBS, desempleo den 2017 ta mas grandi bou di e grupo di 25 pa 34 aña.
Den luna di sèptèmber 2017, Ofisina Sentral di Statistik (CBS) Kòrsou a tene Enkuesta di Forsa Laboral (AKO) na Kòrsou. AKO ta un sondeo bou di e kasnan di famia ku CBS ta tene tur aña den luna di sèptèmber/òktober for di 1987, pa midi e desaroyonan mas resien riba merkado laboral, manera e sifra di desempleo, e nivel di partisipashon, e kantidat di habitante ku tin trabou i e kantidat ku ta buskando trabou.
Den 2016 i 2017 e merkado laboral a konosé algun desaroyo ku a impakta nos sifra di empleo negativamente. Dos ehèmpel di e desaroyonan aki ta retiro di personal na Marriott Hotel i Inselair. Esaki nos ta mira reflehá awor den e subida di e porsentahe di desempleo.
Na sèptèmber 2016 e sifra di desempleo tabata 13.3. E aña aki e sifra aki a subi ku 0.7 punto pa un porsentahe di desempleo di 14.1. E sifra di desempleo a subi ku kasi dos punto for di 2014.
Forsa laboral ta konsistí di e grupo di personan ku tin trabou i e grupo di personan ku ta desempleá. E aña aki, e grupo ku tin trabou a baha ku mas ku 2000 hende; 62,834 na 2017 kompará ku 65,118 na 2016. E grupo di personan ku no tin trabou a subi ku 360 hende; di 9.953 na 2016 pa 10.313 na 2017.
E bahada di e kantidat di empleado i subida di desempleadonan ta e motibu ku sifra di desempleo a subi.
Desempleo bou di hóben (15-24) a baha ku 4 punto di 36.8 na 2016 pa 32.8 na 2017. E subida mas grandi ta den e kategoria di 25-34 aña. E desempleo bou di e grupo aki a subi ku 4.1 punto di 14.7 (2016) pa 18.8 porshento na 2017.
NA KORSOU A SUBI SIGNIFIKANTEMENTE