INTERMEDIO
Un di dos paso ku por tuma ora a pèrdè kontraseña di un imeil adrès ta pa habri un di dos imeil adrès ku por wòrdu usá komo imeil adrès espesialmente pa rekobrá akseso na e promé imeil adrès i visevèrsa. E usuario mester sòru si pa e tin e kontraseña di e di dos imeil adrès na man.
Na di tres lugá por usa un imeil adrès di un persona di konfiansa pa rekuperá e kuenta. Aunke esaki no ta rekomendabel, pero ta un opshon mas fásil i mas lihé kompará ku si e usuario mes lo mester bai traha un imeil adrès nobo.
Na di kuater lugá por yena e asina yamá “recovery questions” (preguntanan pa rekobrá kontraseña). Esakinan ta preguntanan personal ku ta e usuario so sa e kontestanan. Den e opshon aki e usuario ta haña un lista ku algun pregunta personal di kual e mes por skohe kua pregunta e ke kontestá. Algun ehèmpel di e preguntanan aki ta “Kiko ta e nòmber di bo promé kachó?”, “Unda bo mama a nanse?” òf “Ken tabata bo maestro preferí na skol?”. Mester kontestá e preguntanan aki mas honesto posibel pa asina por kòrda nan pa ora mester di nan.
E di sinku opshon ta pa e usuario yena su number di telefòn selular pa asina e kompania por manda un kódigo via SMS ku lo yuda e usuario rekobrá akseso na su kuenta dor di por traha un kontraseña nobo. Pa e opshon aki traha ta importante pa mara semper e number di telefòn selular mas resien na e kuenta onlain. Unabes ku risibí e kódigo via SMS, mester hinka esaki den e paginá wep ku lo keda presentá na e usuario. Si e kódigo ku a hinka ta korekto e usuario ta haña e oportunidat pa traha e kontraseña nobo.
E medidanan menshoná anteriormente lo yuda solamente si a prepará adelantá. Normalmente e servisio onlain mes ta ofresé e opshonnan aki na e momento ku e usuario ta kreando su kuenta onlain. Pues paga bon tinu i yena e informashonnan korekto. Si akaso e usuario no a sigui e pasonan aki òf a pèrdè e kontraseña i tur e medidanan menshoná pa rekuperá su kuenta, tin servisionan/wèpsait ku ta ofresé maneranan adishonal pa rekuperá un kuenta. Pa akseso na e maneranan adishonal pa rekuperá un kuenta, ta rekomendá e usuario pa buska e “help” paginá di e servisio/wèpsait i sigui e instrukshon proveé.