Tin diferente motibu ku un hende lo kis pa kome pafó di kas. Hende ta kome afó pasobra nan tin algu di selebrá, por ehèmpel un hasimentu di aña, un aniversario, un okashon importante òf un hende a slag pa un èksamen. Tin momentunan tambe kaminda pa motibunan di trabou ta kome afó ku klientenan. Tambe por pensa riba personanan ku ta traha hopi riba kaya i ku pa fasilidat ta pasa un restorant òf snèk pa kumpra kuminda. Shofùr di bùs/trùk tambe ta kai den e kategoria di hendenan ku ta kome hopi afó. E fasilidat ku esaki ta trese
Kiko kome afó por nifiká pa bo salú i bo pòtmòni?
Komementu afó por tin algun desbentaha pa esnan ku ta òf ke purba mantené un peso salú. Na promé lugá, bo ta dependé di loke tin di ofresé den e establesimentu kaminda bo ta kome. Prinsipalmente den restorantnan i espesialmente esnan di kuminda rápido, e kumindanan por lo general ta yen di kaloria komo ku tin sous, mayoria bes kombiná ku batata hasá, i den banda e bèrdura ta drechá ku un tiki manteka. E pasaboka hopi biaha tambe ta riku na energia. Tene kuenta tambe ku e fasilidat ku komementu afó ta brinda esun ku tin purá, ta pone ku si e no paga tinu komementu afó por bira un hábito kostoso. Un kálkulo chikí ta mustra ku si tur mainta bo ta pasa kumpra por ehèmpel un pastechi un bòter di awa( pa tene saludabel), fásilmente bo ta gasta 110 florin den un luna, na “desayuno” so ( 22 dia x fl. 5,00). Konta aserka tambe loke bo ta gasta na lùnch....
Pa un persona ku ta kome afó regularmente, i tòg kier kome poko mas saludabel, ta bon pa e tene kuenta ku e siguiente rekomendashonnan.
Usa sous lo ménos posibel. Pidi batata herebé na lugá di batata hasá.
No kome eiskrim ni pudin di mas, mihó remplasá esakinan ku un kòpi di te òf un porshon di fruta. Kome te ora bo sinti ku bo tin djis un tiki gana so mas pa sigui kome. E ora ei stòp di kome. E sintimentu di ta yen ta bin despues. Kome ménos kuminda posibel riba kaya ku ta kontené pan. Pan volkoren òf un par di snechi meergranen, halvarina, un tiki ko’i kome ku pan, karni ku tiki vèt òf un slais di keshi, un produkto di lechi i un porshon di fruta, ta un bon desayuno. Pan ku produkto un tiki salu manera karnisá, wòrs i sardinchi no ta konsehabel. Esakinan no ta duna sufisiente vitamina i mineral i hopi bes nan ta riku na vèt pa mantené nan moli. Batata ku mayonès i un krokèt i diferente salada no por ser konsiderá mas komo un bon remplasante di desayuno, pasobra nan ta muchu vèt.
Ta importante tambe pa bo alargá e proseso di komementu i disfrutá di e momentu; De bes en kuando pone e kuchú ku fòrki abou i bo mente ta krea e “sintimentu” ku bo ta yen. Si bo bai kome ku un otro hende, kome i kombersá (no ku boka yen si)
Tene na kuenta ku orario iregular di trabou por stroba un patronchi di komementu salú. Basta tempu kaba no ta papia mas di orario normal pa kome. Pensa por ehèmpel riba e zùster ku ta traha warda djanochi. Kisas e ta kome un kuminda kayente atardi promé ku e subi warda i podisé desayuná ku pan mainta ora e baha warda, pero anochi tambe lo mester tin un “lùnch” na un orario ku normalmente ta ora di drumi. Strobamentu di e ritmo di drumimentu por kousa sintimentu di hamber, kaminda por tin tendensia pa kome mas ku normalmente lo a kome den dia. Ora nan asina ei ta bon pa buska un kos di hasi ku por kita bo mente for di kuminda i komementu. Esaki por ta un bon paso pa personanan ku ta traha warda djanochi u no tin muchu i ta pasa un anochi trankil. Dor di sòru pa por ehèmpel un buki, obra di man, pùzel òf kualke kos ku bo ta interesá aden, esei por kita bo atenshon for di komementu.
Siña ninga un kuminda òf un ko’i boka dushi ku kòmplimènt, bo por bisa ku e kuminda ta mustra bon, pero ku aworakí bo no tin gana, ku bo a kaba di kome i ku bo ke warda un ratu mas. Ku e posibilidatnan i tepnan akí, bo por ta un tiki mas “armá” pa bo bai un fiesta di hasimentu di aña sin muchu problema.