Pa e vakashon di bo soño resultá unu eksitoso, bo mester ta bon prepará. Un bon preparashon ta kuminsá for di na momentu ku abo komo Konsumidó ta dal e stap pa buk bo ticket. P’esei nos di Fundashon pa Konsumidó ta splika bo tur e detayenan kon pa buk un ticket i kiko mester tene kuenta ku ne.
Kompará promé
Hopi bia konsumidónan ta loyal na un agensia òf kompania di biahe. Kual ta di respetá paso kada ken tin nan propio eksperensia. Pero nos mester ta konsiente ku prinsipalmente den e sektor di aviashon preisnan di ticket ta keda varia. Pues ta sumamente importante pa promé ku bo tuma e desishon di buk un ticket, hasi un komparashon di preis di ticket. Awendia bo por asta hasi esaki sintá den bo sofa na kas i kompará e diferente preisnan.
Ta fleksibel
E dia den siman ku bo tin intenshon di biaha tambe por ta un di e motibunan ku e preis di pasashi ta varia. P’esei ta konsehabel pa bo ta fleksibel i pone vários opshon di fecha pa bo biaha i regresá Kòrsou bek.
Lesa bon. Sòru di ta bon informá!
Den mayoria kaso Konsumidónan sa eksperensia ku e preis di e pasashi ta kambia na momentu ku nan ta bai paga esaki. Ta hopi importante pa bo paga tinu riba gastunan ku no ta keda menshoná, manera e famoso ‘boekingskosten, extra kosten’ etc. Awendia tin kompania ta asta kobra bo pa si bo ke kambia di stul. Pues lesa bon!
Tambe ta hopi importante pa bo wak ki tipo di ticket bo ta kumpra. Mayoria bia, e ticket nan na un preis barata NO ta ticketnan ku bo por hasi kambio na nan. Por ehèmpel si bo ke hasi kambio na bo fecha di regreso.
Plania delantá
Den eksterior bo ta eksperensia hopi ku kompanianan di aviashon ta hasi uzo di e asina yama ‘last minute flight’. Kual ta nifiká ku na lastu momentu nan ta rebaha nan preisnan. Aki na Kòrsou esaki no sa pasa masha. Pues ta konsehabel pa abo konsumidó buk bo ticket lunanan delantá. Dikon? Paso tanten ku e avion ta yenando outomátikamente e kantidat di stul disponibel ta bira mas tiki. Esaki tin komo konsekuensia ku preis pa e stulnan aki tambe ta subi. Pues mas bo warda pa bo buk bo ticket, mas karu bo tin ku paga.
Kita bo kukinan
Algu tambe hopi importante i ku kisas hopi hende no ta konsiente di dje ta e parti di ‘cookies’. Si bo ta subi diferente wèpsait di diferente kompanianan di biahe, e ‘cookies’ nan aki ta kolektá i warda informashon di bo . Tin diferente investigashon andando na kompanianan di biahe kaminda uso di informashon optené via di cookies ta keda usá pa ofresé diferente kliente diferente preis pa e mesun pasashi. Por sosodé ku mas biaha bo subi un wèpsait pa buska un ticket, mas e preis di e ticket ta subi ya ku e cookies ta kolektá mas dato dibo. Ta rekomendabel pa bo kita tur ‘coockies’ nan for di bo kòmpiuter i hasi regularmente.
Pues, si bo ke bai ku vakashon, ta importante pa bo lesa bon, evaluá i tuma e desishon korekto i prepará bo mes pa bo disfrutá di e vakashon di bo soño.