NOTISIA
Autobusbedrijf Curaçao N.V, mihó konosí den boka di pueblo komo ABC Busbedrijf òf ABC, ta brinda e servisio di transporte públiko na pueblo di Kòrsou. E meta prinsipal ta pa brinda e servisio di transportá kliente di un punta pa otro te na e destinashon deseá.
ABC ta ofresé mas ku simplemente "transporte públiko", e ta ofresé e kliente un eksperensia agradabel na un preis pagabel.
Ultimo tempu nos por a nota diferente fasilidatnan inovativo ku e kompania aki implementá. Por ehèmpel e asina yama ‘SmartPass’. Introdukshon di e tarheta aki ta un di e hopi servisionan ku direktor di Autobusbedrijf, sr. John Cijntje ke bini kuné. Den su 1 aña i mei komo direktor general di Autobusbedrijf, sr. Cijntje a bini ta enfoká riba un mihó struktura i mobilisashon.
Fundashon pa Konsumidó tatin sr. Cijntje e programa radial semanal ’Konsumidó Konsiente’, i a kombersá di e diferente
desaroyonan ku ABC tin pensá di implementá riba término largu i kòrtiku.
Un kos ta sigur, nos konsumidónan lo tuma nota di diferente kambio positivo den e sektor di transporte públiko. Un di e kambionan aki ta e orarionan di salida di e bus grandinan, mihó konosí komo konvoi. Esakinan lo sali mas trempan pa asina brinda konsumidónan un servisio muchu mas amplio. Pa loke ta trata e pòstnan na Punda i Otrobanda, esakinan lo ta habri di 6or di mainta pa 6or di atardi sin sera mèrdia.Tambe lo por bai tuma nota di bòrchinan ku lo ilustrá mapa di Kòrsou i tambe spesifikashon di e rutanan. Esaki sigur lo ta algu super bentahoso pa turistanan ku ta hasi uzo di transporte públiko.
Usuarionan di transporte públiko lo nota e desaroyonan aki na final di luna di òktober. Riba término largu, Autobusbedrijf lo enfoká riba struktura i inovashon pa asina garantisá un mihó mobilisashon.
PA MAS I MIHÓ MOBILIDAT