Ku e diskushon tokante di outonan ku stür na man drechi i outonan ku glas skur a lanta un biaha mas diskushonnan interesante den e sektor di tráfiko riba nos isla. Sin lugá a duda e sektor di tráfiko i transporte ta unu ku den su totalidat mester keda mehorá. For di eksámen di tráfiko antikuá kompará ku bòrchinan i situashonnan di tráfiko, un fondo di garantia no-eksistente, un infrastruktura mal mantené ku kayanan sin liña, mal iluminá, drèmpelnan sin bòrchi di indikashon, uso di material inferior pa asfaltá i fèrf kaya, te ku un mentalidat indiferente di outomobilistanan ku no ta duna direkshon, ku ta kore outo ku tur atenshon na nan telefòn selular òf ku ta kere ku kada biaha ku e drenta bou stür e la subi un pista di Fórmula Unu. Echo ta ku kada aña nos ta konstatá un kantidat enorme di aksidentenan di tráfiko ku hopi daño material i ku un kantidat relativamente haltu di morto kompará ku otro paisnan.
E pregunta mas importante lo mester ta den e kaso aki, kiko ta loke nos komo pais lo ke logra pa ku nos tráfiko na Kòrsou? Kiko ta e vishon ku nos tin pa ku tráfiko i mobilidat riba nos isla pa e siguiente aña- i dékadanan? Pa interesante ku e diskushon di glas skur òf outo ku stür na man drechi lo por ta, ta esakinan ta diskushonnan ku nos mester hiba na nivel nashonal? En bes di atendé di manera struktural ku kongestionnan di tráfiko diario? Òf kon mester ampliá nos kareteranan na Kòrsou pa hasi tur e barionan nobo ku a lanta den e lastu dos dékadanan aksesibel? Realidat ta, ku nos parke di outo a krese i lo keda krese tanten nos sistema di transporte públiko no keda adaptá i mehorá. Nos por keda bisa ku mester bini mihó konekshon di transporte públiko entre barionan.
Pero si esnan responsabel pa hasi e kambionan den nos reglanan no hasi nada, nada no lo kambia i nos ta keda sali fo’i Sta. Rosa bai Punda, bai Otrabanda pa bai Sta. Maria.
E punto ta ku, ku òf sin outo ku stür na man drechi òf, ku òf sin glas pretu na outo, bou di e kondishonnan eksistente tráfiko na Kòrsou lo no bira mas òf ménos sigur. Rònt mundu nos ta mira ku un pais ta invertí, por ehèmpel, den un organisashon pa yuda tene komunidat konsiente i bringa pa un tráfiko sigur. Aki na Kòrsou nos tin un Asosashon di Tráfiko Sigur Kòrsou ku su tarea ta pa, entre otro, yuda konsientisá nos komunidat di su komportamentu i reglanan di tráfiko. Lamentablemente e organisashon aki no ta haña niun klase di fondo públiko pa hasi su trabou di un manera diligente. Esaki sigur ta un lástima.
Vishon, komportashon i kòntròl ta tres elemento esensial pa un sistema di tráfiko sigur. Di parti di Fundashon pa Konsumidó nos lo semper duna nos aporte imparsial pa ku kada elemento pa nos yega na un nivel di tráfiko sigur i bon strukturá den kua aksidente i fatalidat ta mas un eksepshon ku un regla.
UN TRÁFIKO
SIGUR
Editorial
PRÓLOGO
Marc Marshall
Direktor