Un artikulo interesante skibi pa Sr. Melly Bergland, Konsehero pa maneho salú di peso.
Si bo ta manera mayoria di hende ku ta preokupá ku nan peso, hamber ta djis un di e puntonan riba bo lista di motibunan pa kome. Awor akí mes lo bo no ta kompletamente konsiente di bo nesesidatnan emoshonal, mental i spiritual ku inkonsientemente bo ta trata na yena ku kuminda. Awor e trabou di detektive ta kuminsá ku skirbi tur kos ku bo kome durante di siman. Komo alternativa, bo por usa un buki chikitu di nota, un skref òf kualke otro kos ku bo por tin na man. Ei lo bo skirbi tur e pida pida kosnan di kome ku parse di no ta konta, manera kuminda ku bo ta purba ora bo ta kushiná, loke bo ta kome ora bo ta wak televishon òf den outo, djis un òf dos buskuchi ku bo ches kuné, etc. Ki ora ku bo kome algu, bo ta skirbi e motibu. E por ta kualke motibu manera si bo tin hamber òf nò, si bo ta fadá, òf si un otro persona a pone bo kome. Inkluí tur kos chikitu, no ta importá kon chikitu. E propósito di e ehersisio akí ta pa bo opservashon propio, no despresio propio. Bo ta liber pa kome kiko ku bo ke. De echo, ta importante pa bo kome loke bo ke, no loke bo ta pensa ku bo tin ku kome. Ta regla ta krea e sintimentu di anhelo ku ta permanesé huntu ku bo konstantemente. A ménos ku tin motibu médiko pa bo no hasié, bo mester kuminsá kome kiko ku bo ke di manera ku bo por konektá ku bo kurpa i permitié komuniká ku bo. Ora bo ta den kontakto ku bo ‘abo ideal,’ lo bo komprondé ku ya bo ta den e fase di perfekshon. Bo komportashon ta simplemente e resultado di e programa den bo mente inkonsiente. Si bo opserv’é, esei ta e manera di mas direkto pa bo prepará pa kambio. Kòrda ku bo ta un detektive; djis mira kiko bo ta hasi di un manera neutral, sin husga.
Un nota riba komementu: evitá di kome skondí.
Si bo ta sinti bon tokante bo mes, bo mester por kome loke bo ke dilanti di ken ku ta. Si bo ta sinti ku bo tin ku skonde, puntra bo mes ta dikon. Riba kuantu página ku bo ta haña nesesario, bo ta skirbi e fechanan, oranan (desayuno, lùnch, sena, snèk, etc.) i tur kos ku bo kome durante e siman. Skirbi tambe pakiko bo a kome, si bo tabatin hamber òf nò, si bo tabata fadá, si un hende a pone bo kome, loke sea. Esaki ta inkluí delaster un kos, asta esnan di mas chikitu. Durante e siman, bo ta bai enfoká riba opservá bo kustumbernan di kome. No tin nada fout ni bon tokante esaki. Simplemente bo ta reuní dato.
Kòrda: e kos di mas importante ta pa bo sinti bo bon tokante bo mes i tuma paso positivo den direkshon di kambio. Despues di pasa un siman ta opservá bo mes i skirbi tur loke b’a kome, bo mester sa mas tokante bo mes dor di skirbi loke bo a ripará. Un di e yabinan di mas importante pa trese kambio permanente den bo relashon ku kuminda ta di hasi un esfuerso konsiente pa opservá e motibunan pakiko bo ta kome mas ku loke bo kurpa tin mester pa nutrishon. Probablemente lo bo nota ku si bo simplemente opservá bo patronchinan di komementu, nan ta kambia. Esaki ta pasobra bo ta kambiando bo komportashon inkonsiente den un komportashon konsiente, i esei ta e promé paso pa trese kambio permanente. Kuminsá monitor bo nivel di hamber i implementá mas strategia pa traha ku e motibunan pakiko bo ta kome, ademas di pasobra bo tin hamber.
Pues, for di awe, kuminsa registra delaster un kos ku “man ta manda boka” i lo bo nota ku ku tempu poko poko bo patronchi di kome lo bai kambiando, naarmate bo ta birando mas konsiente di bo alimentashon.
Stress òf Problema ta kansabo?
Hopi hende ta pensa ku nan ta hala rosea pa haña zürstòf. Tòch esei nota e úniko funshon ku halamentu di rosea tin. Hala rosea ta prinsipalmente importante pa bo deshasí di koolstofdioxide for di bo sistema. Koolstofdioxide (CO2)ta manifestá su mes ora bo sèlnan produsí energia, pero komo di mas na CO2 por ta dañino pa bo salu, bo kurpa mester deshasí di esakinan. CO2 ta hasi e kurpa humano zur. Un ser humano ku no ta hala rosea sufisiente, por ehèmpel pa kousa di COPD (malesa króniko di pulmon) ta kore risiko ku CO2 ta bai den su sanger, por lo kual e sèlnan den e kurpa ta oksidá i ta kuminsá funshoná ménos bon.
Un pèrsona ku ta bon di salu no tin problema ku e por ta e ta hala rosea muchu tiki. Al kontrario, den mayoria kaso un hende ta hala rosea demasiado lihé por ehèmpel dor di miedu, angustia òf strès. Hala rosea di mas òf demasiado purá nos konosé komo “Hiperventilashon”. Hiperventilashon ta ora bo kurpa ta deshasi di demasiado CO2 i esei no ta bon. Bo sanger ta bira mas alkalino, loke ta kontrali di bira zur. Esaki por kousa entre otro sensibilidat den bo mannan òf rònt di bo boka, tambe e por trese problema ku drumimentu, konsentrashon i kramp den spir.
Nivel di zürstòf den bo kurpa
Manera nos splika mas ariba, halamentu rosea, bo tin di hasié di forma balansá, pues ni di mas, ni di ménos. Den un situashon normal, e kurpa humano mes ta regulá i monitoriá kuantu koolstofdioxide tin den e sanger, meskos ku e nivel di oksígeno i e grado di zur den e sanger. Normalmente un hende ta hala rosea presis e loke e kurpa mester pa tene e faktornan ariba menshoná den balansa. E manera ideal pa un hende hala rosea ta di hasi esaki di forma trankil i profundo. Di e forma aki bo pulmonnan ta hala sufisiente aire paden, kaminda e interkambio entre zürstòf i CO2 ta sosodé. Hala rosea di forma lihé i aribariba ta inefikas. Bo kanal di rosea ta yena yen di airu sin ku bo deshasí fásil di esaki.
Momentunan di sosiegu
Segun un eksperto riba e tereno aki, un terapia di hala rosea por trese e kurpa bek den balansa i stimulá un mihó funshonamentu. Tin terapianan di hala rosea dirigí speshalmente riba sierto áreanan. Por ehèmpel asina tin terapia di hala rosea pa hendenan ku ta sufri di asma. Diferente estudionan riba e tereno aki ta mustra ku un bon terapia di hala rosea ta efektivo kontra kansansio, insomnia, hiperventilashon, atake di pániko, depreshon i asta por yuda un hende rekuperá mas lihé despues di un atake di kurason.
Hala paden, hala pafó
Hala rosea trankil dor di nanishi i blas esaki bek afó poko poko. Warda ku e siguiente halamentu te ora bo kaba di saka e rosea kompletu afó. Ripití e ehersisio aki 6 biaha tras di otro.
Téknika di “limpia spil”
Para riba bo pianan i kue un bon rosea fuerte dor di bo nanishi, wanta esaki aden pa 3 sekònde i ekshalá esaki ku boka habri manera ora bo ta bai hala rosea/ limpia den un spil. Pone preshon dje akshon riba bo stoma i saka mas tantu aire posibel.
Hala rosea korekto I balansá bo mes
Hala rosea bo ta hasié mayoria biaha di forma inkonsiente. Pero den mesun rosea, bo por hasi esaki di forma robes tambe. I esei no ta bon pa bo salú. Danki Dios ta posibel siña un hende hala rosea di forma adekuá.
Bo tabata sa ku Dor di hala rosea di forma korekto, bo por kima mas kaloria i baha un par di kilitos..?