Awe nos ke para un ratu ketu na un artíkulo masha importante den buki 7 di nos Kódigo Sivil, ku ta artíkulo 7:28. E motibu dikon e artíkulo aki ta hopi importante ta ku si komo komersiante bo no konosé, esaki por tin konsekuensianan finansiero serio pa bo. E artíkulo aki simplemente ta bisa ku despues di 2 aña e komersiante ta pèrdè su derechi di kobra e konsumidó. Mirando ku lokalmente nos ta birando mas i mas konosí ku e sistema di kompra di pasashi via di internèt, nos ke ilustrá e tópiko aki ku e siguiente kaso.
A sosodé ku un konsumidó a buk 4 pasashi via di internèt, pero despues a keda sin paga nan. E bendedó di pasashi a manda kobr’e un par di bia, pero e no ta reakshoná. Despues e komersiante en kuestion a hiba e kaso Korte i eksigí daño i perhuisio den forma di pago di e kuenta habri. Sinembargo, den Korte e konsumidó ta para ariba ku e no tin un akuerdo di kompra ku e komersiante, pasobra e kompra no a keda será.
Mas aleu e konsumidó ta di opinion ku si tabatin un akuerdo di kompra mes, e komersiante a pèrdè e derechi di kobr’e e montante di e kompra, pasobra e tempu di 2 aña pa hasi esei a pasa. E komersiante di su banda ta insistí ku tin un akuerdo di kompra di pasashi entre nan i ku e tempu pa eksigí pago ta 5 aña i no 2 aña. Si resultá mes ku e tempu ta 2 aña e tin prueba ku e la manda kobra e konsumidó promé ku e tempu di 2 aña a vense, segun e komersiante. Korte a kuminsá ku bisa ku tin un akuerdo di kompra di pasashi entre e partidonan.
Na di 2 lugá Korte ta enfatisá ku un komersiante, ta pèrdè su derechi riba pago, si den 2 aña e no manda kobra e konsumidó. Sinembargo, e komersiante bendedó di pasashi a logra demostrá Korte ku promé ku e tempu stipulá pa lei a vense, e la manda kartanan di kobransa pa e konsumidó.
E echo ku un di e kartanan a bai na e adrès bieu di e konsumidó ta falta di e konsumidó mes, pasobra e no a duna su adrès nobo na e komersiante.
Tur esakinan a pone ku Korte a bai di akuerdo ku e bendedó di pasashi, poniendo ku e konsumidó mester a paga daño i perhuisio na e komersiante i tambe tur gastu di Korte.
Por konkluí ku un konosementu di e leinan i reglanan ku ta rigí e sistema di protekshon di konsumidó ta hopi esensial pa e konsumidó i pa e komersiante. Mes importante ta e obligashon di kada un pa warda tur dokumentunan, pa ora tin mester demostrá un ke otro.
Artíkulo kortesia di abogado Mr. Rainey Conquet
Ultimamente nos a konstatá ku tin hopi aspektonan hurídiko den e sistema lokal di protekshon di konsumidó ku no ta konosí ni pa e konsumidó ni pa e komersiante. E kos di mas importante pa e konsumidó i e komersiante sa, ta ku den e promé parti di buki 7 di nos Kódigo Sivil por haña e artíkulonan di lei ku ta aplikabel riba un akuerdo di kompra entre nan.