Balor di un
De Fair Trade Authority Curaçao (FTAC) ta para pa kompetensia sano i liber. Esaki ta enserá ku e kompetensia entre komersiantenan no ta perturbá i kompetidónan nobo por subi merkado liber di estorbo. Riba un merkado kompetitivo, komersiantenan ta hasi nan máksimo esfuerso pa komplasé e deseonan di konsumidónan. Esaki lo resultá den preisnan mas abou, mas eskoho, mihó servisio i produkto- i servisionan inovativo. Tur esaki lo ta na benefisio di e konsumidó di Kòrsou.
Kompanianan tambe lo saka benefisio di mas i mihó kompetensia. Kompanianan ku ta kumpra nan produktonan serka un otro kompania lo benefisiá di preisnan di kompra mas abou. Asina nan por produsí na un mihó preis i asina krese nan chèns pa eksportá nan produktonan na un preis kompetitivo riba merkado internashonal. Konsekuentemente Kòrsou lo bira mas interesante pa invershonistanan ekstranhero. Loke al final ta promové empleo na nos isla.
For di 1 di sèptèmber ta prohibí pa impedí kompetensia a base di e “Landsverordening inzake concurrentie” . FTAC lo ta e entidat ku ta keda enkargá pa aktuá kontra di kompanianan ku ta violá e lei aki.
Kiko ta e benefisiosonan di kompetensia sano i liber?
Kompetensia sano i liber ta trese un merkado mas efisiente. Esaki ta enserá produkshon mas barata di prudukto- i servisionan. Komersiantenan ta wòrdu obligá na buska maneranan mihó pa produsí pa bini ku produktonan na un mihó preis. Si nan no hasi esaki, otro komersiante ku si ta hasié, si lo bende i saka nan fo’i merkado.
Kompetensia sano i liber ta obligá e komersiante pa aloká su proseso di produkshon mas efektivamente. Bo no por dispidí kere ku bo por saka tur gastu riba e kumpradó pasombra e tin opshon di kumpra serka un otro komersiante ku si ta traha efisiente. Kompra i benta ta keda mihó sinkronisá di e forma aki. Tambe e komersiante lo keda stimulá pa di un forma dinámiko keda inová pa asina bini ku un mihó produkto i ta un stap dilanti di su kompetensia. Sin e estímulo aki komersiantenan tin e tendensia di keda produsí i bende produktonan antikuá, loke ta mina tambe e posishon kompetitivo internashonal di nos pais.
Riba promé di sèptèmber finalmente a drenta na vigor reglanan nobo di kompetensia pa tur kompania nashonal i internashonal ku ta aktivo riba nos merkado lokal. E reglanan aki ta stipulá den e asina yamá ”Landsverordening inzake concurrentie” mester pèrkurá pa mas kompetensia sano na Kòrsou. Rònt mundu a keda probá ku efektonan di un outoridat di kompetensia ta ku preisnan di produkto- i servisionan ta baha, invershonnan ta krese, desempleo ta baha i prosperidat den un pais ta subi. I alabes e posishon internashonal kompetitivo di komersio di nos pais lo mehorá.
KOMPETENSIA SANO I LIBER
ftac aktivo for di 1 di sèptèmber