Mirando ku e kompania tin e poder pa kita loke e ta haña ta bon for di bo kuenta, ki ora ku e ke, rònt mundu e kliente di banko ta keda protehá pa reglanan bankario ku ta duna e kliente e derechi pa hasi kambio na e direct debit. E desaroyonan resien relashoná ku Scarlet a bin laga nos yega na e entendimentu ku bankonan lokal no ta tene nan mes na e reglanan aki. I e echo aki ta hasi e posishon di e kliente di banko hopi vulnerabel pa usa e produkto direct debit. Sigur den dado kaso e kompania kita montantenan robes i e kliente mester prueba despues ku e montante ku a keda kitá no ta kuadra. Pa protehá e konsumidó pa esaki ta usual rònt mundu ku un kliente tin semper e derechi pa drai bèk òf kanselá e pago outomátiko direkto. I e kliente ta avisá e kompania di e kambio den forma di pago pa e kompania stòp ku e direct debit den futuro. Esaki lòs for di e derechi ku e kliente tin pa pa para òf blòkia un direct debit for di su kuenta di banko. Nos mester tene bon na kuenta ku un standing order, direct debit, bank transfer òf pago kèsh ta formanan di pago i hasi un transakshon. E kliente semper tin e derechi di kambia su método di paga. E no ta mará na niun kontrakt den esaki i no mester di outorisashon di niun kompania ni di banko.
Manera nos a konstatá tin bankonan ku ke pa e kliente demostrá e banko ku el a kanselá e direct debit na e kompania. Loke na opinion di Fundashon pa Konsumidó no ta korekto. Sigur si den e kaso di Scarlet ta públikamente konosí ku e kompania no ta dunando e servisio ku su klientenan ta paga pe. E posishon di bankonan ta krea e impreshon ku un kontrakt di direct debit entre e banko i un kompania tin mas balor ku e relashon entre e kliente i su banko ku e ta konfia ku su plaka. Fundashon pa Konsumidó ta konsehá tur kliente di banko pa na momentu ku banko nenga di stòp un direct debit avisá e banko por eskrito di bo instrukshon pa stòp e pago outomátiko. Dado kaso bankonan tòg kita sèn outomátikamente for di bo kuenta, mèldu esaki dirèkt na Fundashon pa Konsumidó.
Tene na kuenta ku tin sierto direct debit ku bo no por stòp manera entre otro pago di un fiansa òf hipotek na bo banko.
Nos a pone tur e karakterístikanan di kada método di pago den e siguiente skema
Direct Debet vs Standing Order