Despues di un aña di trabou pisa, hopi ta esnan ku durante e temporada aki ta biaha pa eksterior pa vakashon, sea ku famia, den grupo òf nan so. Sinembargo, nos ta konstatá ku te ainda tin algun persona ku no ta preokupá pa sera un seguro di biahe. E motibunan pakiko algun ta skohe pa no sera un seguro di biahe, no ta muchu kla pa nos. Sinembargo nos por bisa e konsumidó, ku un seguro di biahe ta hopi importante ora bo biaha pa eksterior pa vakashon òf ku otro meta.
Nan sa bisa na bon papiamentu ku ‘un mal ora ta skonde djis tra’i porta’. Asina por sosodé ku durante bo vakashon, malesa bati na bo porta òf bo bira víktima di ladronisia. Awendia, hopi ku ta biaha pa eksterior tambe ta hür un outo, pa por eksplorá e pais mihó. Por sosodé e ora ei ku un aksidente di tráfiko ku daño ta tuma lugá. Esakinan ta algun di e situashonnan ku lo por presentá, kaminda ku un seguro di biahe por resultá algu hopi útil. Nos tur tambe sa, ku for di dia a introdusí e lei di seguro básiko, no ta sin mas gobièrnu, esta SVB ta paga gastunan médiko ora ku bo bira malu den eksterior. Den un kaso asina ei tambe un seguro di biahe por ta ideal.
Resientemente nos a topa ku un kaso kaminda un partisipante na un biahe organisá, a bira víktima di ladronisia durante su vakashon. Sinembargo sirkunstansianan a pone ku e kompania di seguro di e organisadó di e biahe, no kier a paga e daño i kubri e pèrdidanan ku e partisipante a sufri. Lamentablemente, no ta keda nada otro e ora ei pa e partisipante pa akudí na Korte, pa e por haña rason. Bou di otro sirkunstansianan si, e seguro di biahe di e organisadó di biahe den e kaso aki, lo por a brinda un solushon.
E dañonan i pèrdidanan ku un hende por sufri hopi bia por alkansá montantenan hopi haltu. Pero pa un montante hopi chikí pa dia, e konsumidó por tin un kobertura tòg basta amplio durante di su estadia den eksterior.
Nos ke konkluí bisando ku bon konseho ta kos di sigui. Poniendo tur kos den balanse, nos por bisa ku sera un seguro di biahe ta algu ku ta bale la pena. Ta netamente pa konsehá i alerta e konsumidó tokante posibilidatnan asin’aki, nos tei. No laga pa komo konsumidó despues bo mester bisa, mihó mi a sigui e konsehonan ei, paso e ora ei por ta muchu lat.
Ora di bai ku vakashon ta importante pa sera un seguro di biahe
Segun lei:
Artíkulo kortesia di abogado Mr. Rainey Conquet