Tin bisá ku niun lei ta efektivo si no tin un instansia dediká pa efektuá kòntròl a base di e mesun lei. Esaki ta aktualmente por parti e kaso ku kontrol di fecha di vensementu i artíkulonan no apto pa konsumo ku ta keda bendí. Si no tin un proseso transparente di kontrol den kua un instansia tin outorisashon i ta responsabel pa kontrol i sanshon e leinan ku mester kontrolá kualke infrakshon kontra nan lo bira leinan sin djente.
Den e último dékadanan a kambia e sistema di traha lei i den nos leinan mas moderno ta instituí den un lei komishonnan i/òf kolegionan di supervishon ku mester sòru pa e lei no wòrdu violá sin mas. Komishonnan su ròl hopi biaha ta di ta e órgano di konseho. Kolegionan ta kaminda por duna keho òf hasi apelashon a base di prohibishonnan stipulá den e leinan aki.
Lamentablemente den práktika e realidat ta ku hopi di e institutonan aki hamas ta keda instalá pa nos gobièrnu. Den nos edishon anterior nos a dediká atenshon na e Komishon di Konseho di Alimento ku, si e lo tabata eksistí, lo tabata e organisashon ideal pa atendé ku e krísis di kuminda ku nos ta pasa aden aktualmente riba nos isla. Den pasado resien tambe nos a dediká atenshon na e fondo di garantia di seguro di outo, ku tampoko nunka a keda instalá. Pa ku esaki Asosiashon di Tráfiko Sigur Kòrsou (ATSK) ta hasiendo su máksimo esfuerso pa urgi gobièrnu pa instituí e fondo tan importante aki ku lo yuda esnan ku haña nan den aksidente i e kontrapartido no ta sigurá. Fundashon pa Konsumidó ta sostené e esfuerso di e organisashon ku ta promové seguridat den nos tráfiko na Kòrsou ku, sin niun fondo di supsidio, ta hasiendo tur ku tin den nan poder pa realisá nan metanan.
Den pasado tambe nos a duna atenshon na e Kolegio di Protekshon di Datonan Personal, ku tampoko nunka e keda lantá. Meta di e kolegio aki ta pa na momentu ku un kompania hasi mal uso di datonan personal di un su kliente konsumidó, e por entregá un keho kontra di e kompania na e kolegio. Kompanianan ku ta manehá nos datonan personal ta prohibí pa hasi mal uso di esakinan dor di por ehèmpel bende datonan ku otro kompania, kompartí informashon personal di su kliente ku otro òf hasi kualke otro kos ku bo datonan ku no ta pa loke e kompania a tuma bo datonan pe.
E liña kòrá aki ta, ku nos komo komunidat mester siña protehá nos mes i nos interesnan. Aki e ròl di nos gobièrnu ta esensial. Ku palabra e promesa bunita nos no ta keda protehá. E proseso mester ta regla, kòntròl i sanshon. I kada un di e fasetanan aki mester keda implementá di un manera kla, efisiente, transparente.
Komishonnan i
Kolegionan di Supervishon
Editorial
PRÓLOGO
Marc Marshall
Direktor
Ku nunka a keda instituí