Un Brel di solo ta trahá pa protekshon di nos wowonan, pero no ta tur biaha un brel di solo bunita ta hasi e kos ku e tin ku hasi ku ta protehá nos wowonan kontra e rayonan di solo ku ta baha riba nos i ku por hasi daño na nos wowonan. Un brel di solo ku no ta wanta e rayonan ultravioleta(UV) por ta mas peligroso ku ora bo no tin brel bistí. P’esei ta importante pa nos kis un brel di solo ku ta bon i adekuá pa nos wowonan i no djis pa nos lusi bon.
E daño ku e rayonan di solo por hasi na bo wowo hopi biaha bo no ripará esaki mesora, pero ku tempu lo bo nota ku bo mester di un brel di bista pa mira mas mihó. Un persona ku ser eksponé muchu largu na solo ta kore rísiko di problemanan ku netvlies di e wowo. Dòkternan a nota ku ora bo wak den solo hopi, e rayonan di solo por suak e parti pretu di nos wowo ku esei ta buta outomátikamente ku nos ta bai wak straño. Ora bo tin un bon brel di solo bistí esaki no ta sosodé i e múskulo nan den nos wowo ta relahá i nos pretu di wowo ta mas habri.
Pa mucha- i hóbennan un brel di solo ta altamente rekomendabel. Nan pòpchi di wowo (pupillen) ta mas grandi ku di un adulto i nan “iris” ta kontené ménos pigmento protektor. Dor di esei wowo di un mucha ta mas sensibel pa solo i e rayonan UV. Pa un baby semper ta rekomendabel bistié un sombré òf pèchi i tene mas tantu posibel for di solo.
TEPNAN PA UN BON BREL DI SOLO
Un bon brel di solo ku tin UV-FIltering ta wanta e rayonan di solo ku por hasi daño na nos wowonan. Kis glasnan i un montura di brel ku ta fet i sinta bon na bo kara. Aparte di un montura ku ta kubri bo wowo bon, e glas di e brel mester indiká ku e ta UV400. Un bon brel di solo su glasnan no ta kambia di kolo. E glasnan di bo brel di solo mester ta di polikarbonat ku no ta kibra. Ideal lo ta si por kis pa glasnan polarisá, ku e ta neutralisá e efekto di solo ku por blèndu bo wowonan. Un brel di solo polarisá entre otro ta laga e kolonan mustra mas natural i bo wowo ta kansa ménos.
GLASNAN DI KOLO TA HASI UN DIFERENSHA?
E kolo di e glasnan di bo brel di solo no ta bisa nada di e protekshon ku e brel ta duna, pues glas skur no outomátikamente kier men bo ta mihó protehá kontra solo. E úniko kos ku e glas di kolo ta hasi ta redusí e lus I protehá bo wowo kontra di klaridat.
• Glasnan kolo Shinishi: ta redusié e efekto skerpi di
solo, sin mishi ku e gama di kolo di loke bo ta mira.
• Glasnan kolo Maron: ta sòru pa minimalisá e chèns
ku solo por blèndu bo wowonan, pero ta hasi e
kolonan mas “wazig”
• Glas kolo Hel: ta redusí e “wazigheid” di lus, mihó
ku e glas maron, pero ta distorshoná e kolonan
mas fuerte.
• Glas Bèrdè: Glas di brel kolo bèrdè ta redusí e
efekto reflèks di e rayonan di solo I ta filtra parti di
lus blou. E ta duna un bon kontraste entre
ophetonan.
• Glasnan Ros: Glas di brel kolo ros ta duna un bon
kontraste pa ophetonan ku tin un fondo
(achtergrond) kolo blou òf bèrdè. Glas kolo ros ta
ideal pa personanan ku ta gusta deportenan
akuátiko òf ta hopi riba òf rònt di awa.
E BREL MESTER TA KARU PA E TA BON?
Pa bo haña un bon brel bo no tin nodi di paga hopi sèn. Un Par di aña pasa Consumentenbond a hasi un investigashon den kual a kompará algun brel di solo karu ku brelnan di solo di entre 1 te ku 14 euro ku ta wòrdu bende den pakusnan i tiendanan komun. Lokual a resaltá ta ku e brel di solonan barata/sin marka, ku tin e símbolo di “UV-claim”, ta protehá bo wowo mes bon ku e brelnan karu.
Basta e brel ta indiká “UV-claim” bo por ta sigur ku e ta duna e protekshon nesesario nan bo wowonan.
UN BON BREL DI SOLO
ta muchu mas ku un “Fashion Statement”