Siman Mundial di
Protekshon di Konsumidó
Organisashonnan internashonal di protekshon di konsumidó a dal e promé stap pa yega na un akuerdo pa proponé na Nashonnan Uní pa hasi e Siman Mundial di Protekshon di Konsumidó ofisial bou di ouspisio di Nashonnan Uní
E proposishon ta enserá pa e siman keda organisá tur aña rondó di e Dia Mundial di Derechinan di Konsumidó, ku ta 15 di mart. E proposishon aki lo keda entregá na Asamblea General e aña aki mes pa un desishon final.
Aña pasá Consumers International a kuminsá e trayekto pa pidi miembronan di Nashonnan Uní pa rekonosé e Dia Internashonal di Derechinan di Konsumidó komo un opservashon di Nashonnan Uní. Ta asina ku nashonnan Uní por apuntá un dia, siman, aña i hasta dékada na un tema spesífiko, un asina yamá un opservashon. Kreando e opservashonnan aki, Nashonnan Uní ta promové konsientisashon i akshonnan internashonal pa ku un tópiko. Mayoria di e opservashonnan a keda establesé a base di un resolushon di e Asamblea General di Nashonnan Uní, ounke tambe algun a keda apuntá pa agensianan spesialisá di nashonnan Uní.
Durante e proseso di konsulta a sali na kla ku e palabra “derechinan” no tabata aseptabel pa tur miembro mirando ku tin diferente definishon di e palabra i ku no na tur pais esaki ta enserá mesun kos. Den e kongreso di UNCTAD, ku yama Intergovernmental Group of Experts on Consumer Protection Policy and Law (IGE), a tuma e desishon pa yega na un konsenso i pa no stroba desaroyo di proyekto aki i remplasá e palabra ‘derechi’ pa e palabra ‘protekshon’. Pues e siman lo keda referí na dje komo ‘Siman Internashonal di Protekshon di Konsumidó en bes di derechi si konsumidó.
Consumers International a konsultá ku su miembronan pa haña aprobashon pa e plan pa tin e sosten di Nashonnan Uní pa un dia òf siman di protekshon di konsumidó, hasta si e palabra ‘derechinan no keda usá i mayoria di miembronan a bai di akuerdo ku kompromiso aki.
Si e proposishon keda adoptá na e Asamblea General e aña aki, Consumers International lo keda marka 15 di mart komo Dia Mundial di Derechinan di Konsumidó, den e rekonosementu di Nashonnan Uní di e Siman Mundial di Protekshon di Konsumidó.
Dia Mundial di Derechinan di Konsumidó ta keda selebrá den mas ku ochenta pais riba 15 di mart. Aki na Kòrsou tambe kada aña Fundashon pa Konsumidó ta dediká atenshon na e tema di aña. E dia ta marka e spich di e presidente merikano John F. Kennedy na senado Merikano den kua el a trese dilanti e kuater derechinan básiko di konsumidó. Despues di tempu esakinan a keda ekspandé na ocho derechi di konsumidó ku ta keda rekonosé pa organisashonnan di konsumidó rònt mundu.
Kreashon un Siman di Protekshon di Konsumidó ofisial di Nashonnan Uní, lo yuda alsa konsientisashon di e importansia di protekshon di konsumidó serka gobièrnu, komersio i tambe konsumidónan. Tambe e lo aportá na implementashon di Direktiva di Nashonnan Uní pa protekshon di konsumidó ku resientemente a keda revisá.
Amanda Long, direktor General di Consumers International a bisa “Protekshon di konsumidó ta esensial pa sigurá ku kada konsumidó ta keda tratá hustu i tin akseso na produkto- i servisionan safe i sigur. Hasiendo e Siman di Protekshon di Konsumidó un opservashon ofisial i rekonosé pa Nashonnan Uní to hisa konsientisashon pa ku protekshon di konsumidó i fortifiká derechinan di konsumidónan rònt mundu.
E kampaña pa hasi e Siman di Protekshon di Konsumidó un opservashon ofisial di Nashonnan Uní a risibí un sosten fantástiko di miembronan di Consumers International i di organisashonnan di protekshon di konsumidó. Nos ta spera di por traha huntu ku tur partido konserní pa yega na un akuerdo na e Asamblea General e aña aki.”
Link: Direktiva di Nashonnan Uní pa protekshon di konsumidó: http://unctad.org/es/PublicationsLibrary/ditccplpmisc2016d1_es.pdf