Un artikulo interesante skibi pa Sr. Melly Bergland, Konsehero pa maneho salú di peso.
Si bo ta manera mayoria di hende ku ta preokupá ku nan peso, hamber ta djis un di e puntonan riba bo lista di motibunan pa kome. Awor akí mes lo bo no ta kompletamente konsiente di bo nesesidatnan emoshonal, mental i spiritual ku inkonsientemente bo ta trata na yena ku kuminda. Awor e trabou di detektive ta kuminsá ku skirbi tur kos ku bo kome durante di siman. Komo alternativa, bo por usa un buki chikitu di nota, un skref òf kualke otro kos ku bo por tin na man. Ei lo bo skirbi tur e pida pida kosnan di kome ku parse di no ta konta, manera kuminda ku bo ta purba ora bo ta kushiná, loke bo ta kome ora bo ta wak televishon òf den outo, djis un òf dos buskuchi ku bo ches kuné, etc. Ki ora ku bo kome algu, bo ta skirbi e motibu. E por ta kualke motibu manera si bo tin hamber òf nò, si bo ta fadá, òf si un otro persona a pone bo kome. Inkluí tur kos chikitu, no ta importá kon chikitu. E propósito di e ehersisio akí ta pa bo opservashon propio, no despresio propio. Bo ta liber pa kome kiko ku bo ke. De echo, ta importante pa bo kome loke bo ke, no loke bo ta pensa ku bo tin ku kome. Ta regla ta krea e sintimentu di anhelo ku ta permanesé huntu ku bo konstantemente. A ménos ku tin motibu médiko pa bo no hasié, bo mester kuminsá kome kiko ku bo ke di manera ku bo por konektá ku bo kurpa i permitié komuniká ku bo. Ora bo ta den kontakto ku bo ‘abo ideal,’ lo bo komprondé ku ya bo ta den e fase di perfekshon. Bo komportashon ta simplemente e resultado di e programa den bo mente inkonsiente. Si bo opserv’é, esei ta e manera di mas direkto pa bo prepará pa kambio. Kòrda ku bo ta un detektive; djis mira kiko bo ta hasi di un manera neutral, sin husga.
Un nota riba komementu: evitá di kome skondí.
Si bo ta sinti bon tokante bo mes, bo mester por kome loke bo ke dilanti di ken ku ta. Si bo ta sinti ku bo tin ku skonde, puntra bo mes ta dikon. Riba kuantu página ku bo ta haña nesesario, bo ta skirbi e fechanan, oranan (desayuno, lùnch, sena, snèk, etc.) i tur kos ku bo kome durante e siman. Skirbi tambe pakiko bo a kome, si bo tabatin hamber òf nò, si bo tabata fadá, si un hende a pone bo kome, loke sea. Esaki ta inkluí delaster un kos, asta esnan di mas chikitu. Durante e siman, bo ta bai enfoká riba opservá bo kustumbernan di kome. No tin nada fout ni bon tokante esaki. Simplemente bo ta reuní dato.
Kòrda: e kos di mas importante ta pa bo sinti bo bon tokante bo mes i tuma paso positivo den direkshon di kambio. Despues di pasa un siman ta opservá bo mes i skirbi tur loke b’a kome, bo mester sa mas tokante bo mes dor di skirbi loke bo a ripará. Un di e yabinan di mas importante pa trese kambio permanente den bo relashon ku kuminda ta di hasi un esfuerso konsiente pa opservá e motibunan pakiko bo ta kome mas ku loke bo kurpa tin mester pa nutrishon. Probablemente lo bo nota ku si bo simplemente opservá bo patronchinan di komementu, nan ta kambia. Esaki ta pasobra bo ta kambiando bo komportashon inkonsiente den un komportashon konsiente, i esei ta e promé paso pa trese kambio permanente. Kuminsá monitor bo nivel di hamber i implementá mas strategia pa traha ku e motibunan pakiko bo ta kome, ademas di pasobra bo tin hamber.
Pues, for di awe, kuminsa registra delaster un kos ku “man ta manda boka” i lo bo nota ku ku tempu poko poko bo patronchi di kome lo bai kambiando, naarmate bo ta birando mas konsiente di bo alimentashon.
E siman aki nos ta trata ponementu di meta positivo
pa bo salú dor di spesifiká lokual bo ke i no lokual bo no ke.
Otro intersante artikulo skibí
i produsí pa Sr. Melly Bergland.
Pone meta positivo
pa bo salú
Kiko ta bo metanan? Na ta kla I bon defini? Nan ta realisitiko?
Pa bo metanan ta mas efektivo, tene kuenta ku e siguiente kondishonnan:
1. Pone metanan positivo; spesifiká lokual bo ke i no lokual bo no ke. Poniendo metanan positivo, bo ta enfoká riba e resultado final ku bo ke logra.
2. Limitá bo meta na loke ta den posibilidat di bo kontrol; no lubidá di spesifiká di ki manera bo ke logra esaki.
3. Konservá e kalidat positivo di bo bida actual; pone un meta di tal forma ku e ta mantené tur loke bo ta balorá mas den bo bida.
4. Deskribí un meta tangibel ku bo por midi i test; bo mester por sa ki ora bo a logra bo meta. Si bo meta ta “ser felis”, ta hopi difísil pa bo sa ki ora bo a logr’é, i si e lo dura. Si bo kambia e meta di ser felis den unu ku ta mas spesífiko i bisa ku bo ta bai pasa kuater ora di kalidat huntu ku bo famia tur siman, esei sí ta un meta ku bo por midi.
5. Hasi e meta unu di balor pa bo; pone un meta ku realmente bo ta deseá.
Bo meta mester kontené algu ku bo ta konsiderá importante i di balor. Hopi di nos problemanan ta skondí den e palabra: obligashon/responsabilidat.
Ehèmpel: un mucha por deseá di tin un kachó, pero e no ke tin e obligashon òf responsabilidat di dun’é kuminda òf sali keiru kuné tur dia, asta den mal tempu. Un hóben por tin e deseo di tin un outo, pero no e responsabilidat i obligashon di paga seguro i mantené e outo. Un adulto por deseá di tin un relashon sentimental dushi, pero e no ke tin e obligashon di t’ei ora e partner ta den krísis.
Esaki ta e naturalesa di ser humano. Ser humano ta konsiderá ku si ya el a paga kaba pa optené su meta, e no ta haña ku e tin ku paga tambe pa e responsabilidat kontinuo. E obligashonnan ku éksito ta trese kuné i e responsabilidat di funshoná riba un otro nivel por tumba algun persona ora nan sinti ku di bèrdat nan ta bai alkansá nan meta. Si na e momento ei bo keda para stabil i sigui bai dilanti surpasando tur miedu, ansha i duda, nos ta sigurá bo ku e rekompensa lo ta muchu, pero muchu mas haltu ku e preis ku bo a paga.
Pues, bo mester tene kuenta ku kada paso ku bo dal, pasobra e bahada di seru semper ta mas difísil ku e subida, pero bo mester sa tambe ku kada paso ta nifiká un logro pa alkansá bo meta kompleto. Kada un di e pasonan akí ta laga bo yega mas serka di bo meta final, ku ta e pia di seru. Paso pa paso, meter pa meter i maske bo kai, bo ta lanta bèk manera bo por, i sigui persistí.
Na e momentonan ku un hende ta sinti su mes mas malu, momentonan di angustia, momentonan ku e ta sinti ku su forsa ta kabando i ku e ta na punto di entregá, na e momento ei ta su propio boluntat ta determiná si e ta keda den wega. Nos ke pa abo haña den bo mes e fuente balioso, e persistensia presioso, e poder di sigui e kaminda kompleto i haña e kurashi i poder akí berdaderamente kada bes di nobo. Di ki manera nos por hasi e kambio di un aktitut di entrega pa un aktitut di lanta para? Kon nos por sigui, sigui i sigui si tur kos den nos ta bisa nos bai bèk na nos zona konfortabel?
Bisa loke bo ke i no loke bo no ke.