Anteriormente nos a para ketu na e sistema lokal di duna garantia na e konsumidó ora esaki kumpra un òf otro produkto. Hopi komersiante ta asta pretendé di no duna garantia na e konsumidó òf di duna tempu di garantia hopi kòrtiku. Sinembargo, lei ta sali for di e punto di bista ku si konstatá un defekto na un produkto denter di 6 luna, despues ku a kumpra esaki, por asumí ku e produkto for di un komienso tabata unu defektuoso. Ta na bendedó di e produkto e ora ei pa demostrá ku esaki no tabata e kaso.
Asina a pasa tambe den un kaso kaminda e konsumidó a kumpra un telefòn ‘online’. A bin sosodé ku despues di 2 siman e telefòn su pantaya a sker. E konsumidó mesora a pone e bendedó na altura di esaki i eksigí pa remplasá e telefòn. E bendedó sinembargo a nenga di hasi esaki i e kaso a bin terminá den Korte. Wes den su veredikto a mustra riba e artíkulo di lei ku ta bisa ku si un produkto daña denter di 6 luna despues ku a kumpra esaki, por asumí ku e produkto tabata unu ku for di momentu di e kompra tabatin un defekto. E komersiante di su banda a haña e oportunidat pa demostrá ku esaki no tabata e kaso den kaso aki. E la trese dilanti ku e telefòn lo mester a kai òf dal den algu. Pero e no a logra demostrá ku esaki realmente a pasa. Pa e motibu ei wes a stipulá ku e komersiante tin obligashon di drecha òf remplasá e telefòn pa e konsumidó sin kobra e konsumidó nada.
E veredikto aki na nos pareser ta unu masha pekuliar. Esaki pa motibu ku e konsumidó en bèrdat tin un protekshon amplio den lei, sigur denter di e promé 6 lunanan ku e kumpra un produkto. Sinembargo e echo ku e komersiante no por a proba kontrali so a hiba wes na konkluí ku e sker den e telefòn tabata tei for di un komienso pa nos a bai muchu leu. Di otro banda si e konsumidó en bes di a kumpra e telefòn ‘online’, a kumpra esaki den un tienda di telefòn, probablemente lo a hasi un diferensia pa resultado di e kaso. Si E komersiante na nos pareser lo por a skapa tambe di responsabilidat, si e lo a logra demostrá ku e tipo di defektonan aki, no por tabata eksistí for di momentu di e kompra. Wes e ora ei lo a sali for di e punto di bista ku ta pa falta di e konsumidó mes e pantaya a sker i e daño lo a keda pa kuenta di e konsumidó.
Apesar ku Kòrsou ainda no tin hopi tienda lokal ku ta bende ‘online’ e fenómeno aki a kuminsá poko pero sigur ta drentando nos komersio. Tantu e konsumidó komo e komersiante lo hasi hopi bon di tuma bon nota di reglanan, leinan i verediktonan di Korte ku ta konta den kasonan di kompra via internèt. Sigur ora ta trata garantia riba produkto.
Artíkulo kortesia di abogado Mr. Rainey Conquet