Propaganda
Den propaganda, un dunadó di krédito mester informá na un manera kla i konsiso mediante un ilustrashon manera esun den anekso 2, en todo kaso, e karakterístikanan prinsipal di un produkto
di krédito. Ta rekerí pa e tasa di interes huntu ku kualkier otro gastu ta inkluí den e kosto total di
e krédito di konsumo. E aviso mester presentá informashon na un manera kla i no ta permití pa e kontené ningun deklarashon engañoso, kontradiktorio ni ineksakto. Si tin nota na pia di página, nan mester ta skirbí ku lèter sufisiente grandi i fásil pa lesa. Por usa e abreviashon APR basta e término ‘Interes Anual Efektivo’ ta aparesé kompleto otro kaminda den e aviso. Si e aviso ta basá riba sierto
suposishon, mester menshoná tal suposishonnan i si un aviso menshoná un tasa di rentabilidat
(‘rate of return’), esei mester ta e APR.
Publikashon ora di kontestá pregunta i promé ku duna krédito di konsumo
Pa un konsumidó por tuma un desishon fundá tokante si e lo sera un akuerdo di krédito, e
dunadó di krédito mester dun’é tur informashon relevante a base di e kondishonnan di krédito ku
e dunadó di krédito ta ofresé. Ora di kontestá pregunta tokante krédito di konsumo òf promé ku ekstendé krédito di konsumo, e informashon duná spesífikamente tokante e krédito di konsumo mester menshoná a lo ménos lo siguiente: e tipo di krédito, e karakterístikanan di e produkto di krédito ilustrá den anekso 2, huntu ku un tabèl di amortisashon, ilustrá den anekso 3, e kondishonnan di e akuerdo hurídiko entre e konsumidó i e dunadó di krédito, i e kondishonnan ku ta regulá kon ta kalkulá e tasa di interes riba fiansa.
E dunadó di krédito no tin mag di fòrsa e konsumidó optené un produkto òf servisio (por ehèmpel un pólisa di seguro) serka un entidat òf persona spesífiko, ni serka e mes ni ningun di su afiliadonan, komo kondishon pa e risibí e krédito di konsumo.
Tur informashon relashoná spesífikamente ku e krédito di konsumo mester ta por eskrito riba un medio duradero i formulá di tal manera ku no por interpretá nan na mas ku un manera. Tambe nan mester hala atenshon di e lektor. Tantu e tasa di interes riba fiansa komo e APR mester aparesé klaramente (i den e mesun formato) den e akuerdo di fiansa. Ademas, e konsumidó mester firma un kopia di un tabèl manera esun ku ta aparesé den anekso 2 promé ku sera un kontrato di krédito di konsumo kuné. Mester fail un kopia di e tabèl ilustrá den anekso 2 despues di a firm’é i un deklarashon firmá ku ta bisa ku e konsumidó a aseptá e seguro sin niun tipo di restrikshon.
APR i e métodonan pa kalkul’é
APR ta e interes anual ku ta igualá riba un base anual e balor deskontá di tur futuro i eksistente kompromiso (montantenan di krédito ku e konsumidó a tuma, pago di e krédito i gastu finansiero) ku e dunadó di krédito i e konsumidó a kumbiní. Pa kalkulá e APR mester usa e fórmula matemátiko i e métodonan deskribí den anekso 1. Pa kalkulá e APR mester determiná e kosto total ku e krédito ta trese kuné pa e konsumidó. Ora kalkulá e APR, mester sali for di e punto di bista ku e akuerdo di krédito lo keda vigente durante henter e periodo kumbiní i ku tantu e APR komo e otro gastunan lo keda fiho pa e montante fiá durante e durashon di e akuerdo di krédito.
Wardamentu di dato
Un dunadó di krédito mester warda dato relashoná ku e APR a lo ménos dies (10) aña despues ku e akuerdo di krédito terminá. Pa un dunadó di krédito por demostrá kumplimentu i ku e Disposishonnan di APR akí, e mester por proba ku el a: establesé prosedimentu pa garantisá ku ta publiká informashon di akuerdo ku loke ta menshoná den párafo 5, kumpli ku tal prosedimentunan, warda informashon ku el a publiká, kopia di aviso i notifikashon di kambio di kondishon i informashon tokante tasa di interes riba fiansa i e ‘APR’-nan ku el a ofresé. Durante su kontròlnan ‘on-site’, Banko lo verifiká kumplimentu i ku e Disposishonnan di APR akí.
KUANTU MI TA PAGA PA MI FIANSA
?