DEN CHIKÍ
“Den Chikí” e luna aki ta pone atenshon na e tópiko di kompranan inpulsivo òf mihó bisá Miskopen. Lesa pa bo ta bon informá.
1
Konsumidó ta reklamá: Mi mester paga e gastunan di anulashon?
“ Nos a kumpra un set di kama ku ora no sa yega kas a resultá di ta muchu grandi. Awor nos a haña nos ta anulá e kompra. E negoshi no ta tin problema ku esaki pero si kier kobra nos awor 25% gastunan di anulashon òf nos ta risibí un deskuento di 300 florin ora kumpra un set di kama nobo. Pero ami no ta interesá mas, mi kier mi sèn bèk. Mi tin derechi riba esaki?”
E kontesta ta NO.! Bo no tin derechi riba bo sèn bèk. De fakto e komersiante por mantenébo na e kompra. Na Hulandes nan ta bisa “koop is koop”. Konsumidó mester a chek i midi promé si e set di kama ta pas den su kamber. Un otro kos tabata si ta e negoshante a garantisá ku e sèt ta pas. E ora ei si e konsumidó lo tabatin un punto. Si e komersiante ta dispuesto pa anulá e kompra e por kobrabo gastu di anulashon. Ta un fabor e ta hasibo i pa esaki e por kobrabo algu.
2
Mi por hiba e sofa bèk?
Konsumidó a kumpra un sofa despues di a tèst esaki un par di biaha den showroom. Dia e negoshi a entregá esaki, konsumidó ta sinti manera kos ku e sofa aki ta mas duru ku esun ku e la tèst. Segun e komersiante, ta e mesun stul, pero unu nobo. Konsumidó por debolbé e stul?
Kontesta: ta dependé di diferente faktor. E echo ku e modèl di show ta sinta otro for di esun entregá, no ta un prueba ku e stul entregá falta algu. Pa determiná esaki mester hasi un investigashon. Si for di e investigashon resultá ku e sofa tin un desperfekto, e komersiante mester drecha esaki òf kambia e sofa pa un otro. Si no por yega na un solushon, e ora ei e konsumidó por disolvé e kompra. E komersiante na su turno tin di duna konsumidó e sèn pagá bek i tuma e sofa bèk. Den kaso ku no por yega na un akuerdo, semper por aserka Fundashon pa Konsumidó pa asistensha i intermediashon.