Editorial
PRÓLOGO
Nos ta spera ku e aña habri kada unu di nos konsumidónan den prosperidat i e tim dinámiko di nos fundashon ta deseá un i tur un felis temporada di Karnaval. Den 2017 Fundashon pa Konsumidó ta sigui ku su trabounan di konsientisá i empoderá nos komunidat konsumidó. Un di e puntonan di lansa pa e aña aki ta kolaborashon. Kolaborashon ku otro gruponan di interes, ku institutonan di regulashon, ku gobièrnu i sektor komersial.
Ya den 2016 nos a papia ku Bureau Telecommunicatie Post & Utiliteiten (BTP&U) pa sondea posibilidatnan di kolaborashon riba tereno di edukashon di konsumidó den e sektor di telekomunikashon. E intenshon ta pa intensivá e kombersashonnan i yega na proyektonan konkreto pa mehorá kalidat di servisio den e sektor aki. Tambe nos lo sigui, huntu ku Asosiashon Tráfiko Sigur Kòrsou, ku nos empeño pa yega na instalashon di e asina yamá Waarborgfonds Motorverkeer, ku lo mester garantisá kompensashon di daño okashoná den tráfiko den kasonan kaminda esun kulpabel no tin un seguro bálido.
Tambe nos fundashon ta apoyando e inisiativa di Organisashon Pro akshon pa Kalidat Duradero pa yega na un alse struktural di kalidat di suministro di koriente na Kòrsou. E intenshon ta pa yega na un base di sosten mas amplio posibel pa pone kalidat di suministro di koriente riba agènda nashonal di nos pais. Nos a tene kombersashonnan, pa esaki ku Defensor di Pueblo ku tambe ta sostené e vishon mutuo di e tres organisashonnan.
A base di kehonan den nos sektor di aviashon i e kontesta riba e karta ku konsekuentemente nos fundashon a manda pa nos Minister di Transporte Públiko, Tráfiko e Komunikashon, nos ta premirá mas kolaborashon entre Fundashon pa Konsumidó i e Outoridat di Aviashon Sivil Kòrsou riba tereno di protekshon di derechinan di e konsumidó biahero.
Asina nos tin mas otro entidatnan ku Fundashon pa Konsumidó lo aserká pa kolaborá kuné i saka sinergia for di vishon, mishon i áreanan di trabou mutuo. Tur esaki na bienestar di e posishon di abo konsumidó.
Un felis Karnaval.
Marc Marshall
Direktor
Kolaborashon den 2017