No hasi miskiña òf kremenchá
Ta sumamente importante pa hunta un kantidat rasonabel di krema di protekshon kontra solo na bo kurpa. Segun investigashonnan, pa bo por tin un protekshon optimal, bo mester hunta 35 gram òf 6 kuchara grandi.
Tene na kuenta ku mas tiki bo hunta, ménos protekshon lo bo risibí. Si por ehèmpel bo usa mitar di loke tin stipulá riba e empake di e krema pa solo, esei ta nifiká ku bo protekshon tambe a minimalisá na mitar.
Sakudí promé ku usa
Ta rekomendabel pa semper sakudí tur produkto líkido promé ku e wòrdu usá. Esaki ta konta pa krema di protekshon kontra solo tambe.
Hunta produkto na ora
Hopi bia nos ta kometé e fayo di hunta krema di protekshon kontra solo na momentu ku nos ta den solo kaba. Pa por risibí mihó protekshon, ta konsehabel pa apliká e krema aproksimadamente 15 pa 30 minüt promé ku eksponé e kurpa den solo. Pues, si ta den marcha di karnaval bo ta òf simplemente kantu di kaya? Hunta bo krema di protekshon kontra solo promé bo sali kas.
Ripití regularmente
Tin di nos ta keda hopi ora bou di solo. Ounke esaki ta parti di nos klima, bo tin ku protehá bo mes. P’esei ta rekomendabel pa hunta un krema di protekshon pa solo por lo mínimo kada dos ora, pa garantisá ku bo protekshon ta optimal.
Zona nan delikado
Hunta bo kurpa kuidadosamente. Pues no hunta un tiki na pia, man i nanishi, pero tambe orea skouder , lep, garganta i si kabes ta limpi, tambe ta rekomendabel pa hunta. Pa hende muhé nan ku ke bisti strepless of topless mester duna e pechunan protekshon extra dor di hunta hasta e tepelnan.
Fecha di vensementu
no usa un krema pa solo ku ta habri mas ku un aña largu. Remplasá esaki regularmente ya bo tin un protekshon optimal.
Uza krema di protekshon kontra solo korektamente.
PROTEHÁ BO MES!
Temporada di karnaval ta un di e temporadanan ku mas nos ta eksponé nos kurpa den solo. E daño ku esaki por kousa nos, hopi bia nos no ta konsiente di dje. P’esei nos ta konsehá pa den e temporada aki hasi uzo di un krema di protekshon kontra solo. Esaki lo protehá bo i yuda prevení kualke daño na bo kueru.