UN MAKIAHE DIFERENTE DEN KARNAVAL
2017
Temporada di karnaval ta e temporada ku nos por ‘go all out’ i eksperimentá ku makiahe, hasiendo uzo di nos fantasia pero tambe di e produktonan adekuá.
Rekomendashon pa un makiyahe duradero
Pa bo makiahe dura henter marcha di karnaval, ta rekomendabel hasi uzo di un ‘silicone based foundation’. Esaki ta un tipo di foundation ku ta ideal pa aktividatnan manera karnaval. Sinembargo, promé ku bo apliká of kumpra esaki, ta bon pa bo sa kon pa kombiná bo ‘silicone based foundation’ ku bo makiyahe.
Wayne Goss, kual ta un ‘Makeup Artist’ profeshonal i ku ta hasi uzo di media sosial pa duna diferente tep di makiyahe, ta splika e motibu dikon hopi hende tin problema ku nan foundation (base). Pa bo evitá ku bo foundation lo basha durante marcha di karnaval, e mester ta kompatibel ku bo produktonan di limpiesa di kara I tambe bo ‘primer’. Segun Wayne ta splika, produktonan di ‘silicone’ no ta kompatibel ku produktonan di zeta. Pues si bo ke pa bo base ta unu ‘on fleek’, no uza un base di ‘silicone’ ku un ‘primer’ of un produkto di limpiesa di kara ku ta kontené zeta. Pues si bo ta skohe pa un ‘silicone based foundation’, e otro produktonan tambe mester ta di ‘silicone’.
Pa un makiahe no solamente duradero pero tambe unu mas konfortabel, bo por hasi uzo di ‘airbrushed makeup’ pa e temporada di karnaval aki. Ku e tipo di makiahe aki lo bo no sinti ku bo tin makiyahe na bo kara. Tambe e ta ideal si bo ke tapa bo tatuahe, sikatris of stretch marks.
Tepnan pa un makiyahe karnavelsko
Nos karnaval ta konosí komo un di esnan mas kreativo na mundu. Pa loke ta trata makiyahe, kreatividat ta hopi importante si bo ke ta úniko. ‘Go all out’ ku bo makiyahe. Komo punto di salida pa un makiyahe kreativo i úniko, ta konsehabel hasi uzo di e tópiko i tambe e kolónan ku bo grupo di karnaval ta disfrasá na dje, pa bo implementá esaki den bo makiahe.
Bo no ke un makiyahe muchu simpel? Hazi uzo di kuashi i fèrf pa kara pa bo krea e pintura ku lo laga bo lusi úniko den marcha.
Pa bo aksentuá sea bo makiahe of bo pintura, stenchi pa kara ta e opshon ideal. Tin un variedat amplio di kolónan i tambe tamayo di stenchi optenibel aki na Kòrsou. Ta hopi importante pa bo stenchinan dura for di salida te na final di marcha di karnaval. Pues, hasi uzo di un bon leim pa wanta esakinan.
Gleter ta algu ku den karnaval no por keda afo. Awendia tin diferente ‘eyeshadow’ di gleter di diferente kolo, ku lo laga bo makiahe lusi aun mas bunita. Gleter tambe ta optenibel den forma di un tubu di spuit. Ku esaki bo por spuit no solamente bo kara pero tambe bo kurpa i bo trahe.
Pa bo makiahe karnavalesko lusi perfekto, bo lep mester ta ‘on fleek’. Hasi uzo di kolónan bibu pa resaltá bo makiyahe. Awendia bo por skohe entre diferente tipo di lipstick. Bo por skohe entre esun ku ta seku (mat), esun glossy of unu ku ta intermedio. Tambe riba bo lep bo por apliká gleter of stenchi, si bo ke bai mas leu ku bo makiahe.
Hasi bo reservashon trempan
Hopi ta esunnan ku no por makia nan mes, pero ku si tin e deseo pa lusi un makiyahe bunita i karnavalesko. Pa e personanan aki ta sumamente importante pa bo aserka un profeshonal i hasi bo reservashon trempan. E temporada aki ta un temporada hopi druk, kual por pone ku bo mester akudí for di marduga of te asta e anochi prome ku marcha pa bo hasi bo makiyahe. Si esaki no ta un opshon pa bo, nos ta konseha bo: hasi uzo di youtube! Awendia tin diferente ‘Makeup Tutorials’ online kual por fasilitá bo den e proseso pa yega na un makiyahe perfekto.
No falta hopi pa e temporada di karnaval 2017 yega su final. E temporada kaminda nos pueblo ta uni i demostrá su alegria, kreatividat i fantasia den diferente aspekto. Un kantidat basta grandi di hende lo subi kayanan di Kòrsou e aña aki pa asina selebrá i disfrutá di nos fiesta kultural. Awe nos ta dediká e rúbrika aki netamente na nos karnavalistanan ku ke lusi un makiyahe perfekto durante marcha di karnaval 2017.