Pa e temporada di Karnaval aki un biaha mas Fundashon pa Konsumidó, konhuntamente ku Ministerio di Desaroyo Ekonómiko, a hasi komparashon di preis di e produktonan for di e makutu di Karnaval. Den e periodo di 30 di januari pa 9 di februari 2017, Ministerio di Desaroyo Ekonómiko a anota preis di un kantidat di 158 produkto na 15 establesimentu. E establesimentunan ku a keda bishitá ta: Arco Iris, Best Buy, Bon Biní, Boulevard Marketplace, Centrum Mahaai, Centrum Piscadera, Colón, De Ruyterkade, Esperamos, Feng Enterprises, Mangusa Rio, Mangusa Hypermarket, Vreugdenhil, 2000 i Zhifeng.
E pakete di karnaval ta konsisti di diferente kategoria di produkto manera awa mineral, djus, limonada, soda water, serbes, whisky, rom, biña, chips, karni, tuna, makaroni, berdura den bleki, mayonaise, kèchùp, mustard, papel di wax, napkins, kùp i tayó di plèstik.
Bon Bini Supermarket, E establesimentu ku mas produkto ekonómiko
For di e resultadonan di e anotashon di preis, por konkluí ku Bon Bini Supermarket ta e establesimentu ku tin mas produkto na un mihó preis. For di e 158 produktonan, Bon Bini Supermarket tin 39 produkto na e preis di mas abou. Na di dos lugá a resultá Mangusa Hypermarket ku 34 produkto i na di tres lugá Mangusa Rio ku 33 produkto na un mihó preis.
Kumpra material kaminda ta kumbiní bo
Analisando e komparashon di preis di nos makutu di Karnaval, nos por konkluí ku tin diferente supermerkado ku ta skor mihó ku otro den sierto kategoria.
Si pa e temporada di karnaval aki bo ta buskando djus, awa mineral i soda water, na un mihó preis, ta na Bon Bini Supermarket bo mester ta. Pa biña i Coca-Cola i Fria lokal na un mihó preis, ta Centrum Mahaai i Piscadera ta e lugá. Na Best Buy tambe tin un variedat di djus na preis ku ta kumbini e pòtmòni.
Diferensia di preis
Remarkabel den e investigashon aki ta e diferensia grandi di preis entre e establesimentunan; sigur pa loke ta trata e kategoria di bibidanan alkohóliko. Por ehèmpel un krat di serbes Heineken na bòter ta kosta na Centrum Mahaai i Piscadera fl.51.61 i na 2000 esaki ta kosta fl.59.95, kual ta un diferensia di fl.8.34. Un krat di bòter di serbes Polar ta kosta na Supermarket Colon fl.44.95 i na Vreugdenhil esaki ta kosta fl.56.95. Esaki ta un diferensia di preis di fl.12.00. Whisky Black Label di 750 ml ta kosta fl.54.95 na Mangusa Rio i Hypermarket, siendo ku na FENG Supermarket esaki ta kosta fl.78.95. Esaki tin un diferensia di fl.24.00 .
Tepnan útil pa temporada di karnaval
Despues di a tuma nota di e resultadonan di e anotashon di preis di e pakete di karnaval, Fundashon pa Konsumidó ke motivá tur konsumidó tuma nota di e komparashon di preis aki pa bo por tin un bista di e preisnan den e diferente establesimentunan. Temporada di Karnaval ta un temporada kòrtiku, pero unu hopi drùk. Pues, Kòrda traha un lista di kompra promé ku bo bai hasi bo kompra.
Por haña e tabèl di komparashon di preis riba nos wèpsait, www.fundashonpakonsumido.org. Pa mas informashon tokante komparashon di preis òf otro aspektonan ku ta relatá na konsumidó, tuma kontakto ku Fundashon pa Konsumidó na telefòn 462-6666 òf manda un meil na [email protected].
Fundashon pa Konsumidó ta deseá pueblo di Kòrsou un Felis Karnaval 2017. Kòrda gosa konsiente i aktua responsabel.
Pakete di Karnaval
Komparashon di Preis