Resultadonan:
Kantidat di kleim ku a risibí kontra DAE: 588;
Suma total di pasashinan pagá: ANG. 351.663,09;
Suma total di gastunan adishonal pa motibu ku DAE no por òf por a kumpli:
ANG. 97.797,31;
Suma total kleimnan risibí kontra DAE: ANG. 449.460,40.
Pa Fundashon pa Konsumidó tabata importante pa sali na vanguardia di e pasaheronan ku a kumpra ticket na DAE. Historia ta mustra ku den kaso ku un kompania di aviashon bati bankarota, e konsumidónan ta esunnan ku mas ta sali perhudiká.
Miéntras ku medionan di informashon a enfoká riba e konsekuensianan pa e sektor turístiko i nos ekonomia en general, Fundashon pa Konsumidó a purba wak kon por sali pa derechi di e pasaheronan.
Fundashon pa Konsumidó a tuma kontakto ku un di e kuratòrnan apuntá dor di korte na momentu ku a deklará e kompania bankarota, abogado Paul van de Laarschot. Ku señor Van de Laarschot a kombení ku Fundashon pa Konsumidó lo hasi un apelashon públiko na tur pasahero ku a bira víktima di e situashon aki, pues tur e pasaheronan ku a paga pa nan pasashi pero ku lo no por hasi uso di e servisio ku nan a paga p’e, pa nan pasa na Fundashon pa Konsumidó pa asina entregá nan kleim kontra DAE. Despues di a risibí tur kleim, Fundashon pa Konsumidó lo a entregá nan na e kuratòr.
Riba 10 di sèptèmber 2013 Fundashon pa Konsumidó, hasiendo uso di diferente medionan di komunikashon, a hasi un yamada na tur konsumidó ku a kumpra ticket na DAE i ku pa motibu di kiebro
di e kompania lo no por hasi uso di nan ticket pa pasa na nos ofisina ku nan dokumentashon pa entregá nan kleim òf pa manda nos nan datonan via email . E personanan ku a pasa Fundashon pa Konsumidó pa entregá nan kleim kontra DAE tabata muchu mas di loke a spera. A risibí kleim di personanan di diferente pais, por ehèmpel Haiti, Merka, Venezuela, Sürnam, Merka, Repúblika Dominikana i tambe di diferente otro paisnan den reino manera Hulanda, Aruba, Boneiru i Sint Maarten. Riba 29 di novèmber 2013 Fundashon pa Konsumidó a entregá tur kleim ku a risibí na kuratòr Van de Laarschot.
Fundashon pa Konsumidó sigur ta di opinion ku den futuro mester bini un seguridat pa konsumidónan ku ta kumpra pasashi, sea na e kompania di aviashon mes òf via un agensia di biahe. Kisas un waarborgfonds por ta un solushon na e problema konfrontá dor di sentenáres di pasahero. Den e último tres dékada tres kompania di aviashon lokal a bai fayit (ALM, DCA i awor DAE). Nos tin ku bin ku un sistema pa protehá e konsumidó den kasonan manera DAE.