Editorial
PRÓLOGO
Otro aña mas kasi ta tras di lomba. 2016 tabata un aña ku Fundashon pa Konsumidó a dediká atenshon pa ta mas seka di abo konsumidó buskando partisipashon aktivo di e konsumidó individual. Muestra palpabel di esaki tabata e petishon ku Fundashon pa Konsumidó a saka pa kada konsumidó duna sosten i pa huntu eksihí di gobièrnu un mihó trato di nos konsumidónan na momentu ku e ke biaha pa eksterior i ta a la mersed di kompanianan di aviashon.
Pa 2017 Fundashon pa Konsumidó tin komo meta prinsipal stipulá pa traha pa yega na normanan pa nivel di produkto i servisionan ku ta keda bendí na Kòrsou. Den pasado nos a papia kaba di normanan ISO ku internashonalmente ta keda rekonosé. No ta manera nos mester bai inventá e webu di Colon. Tin normanan na nivel mundial ya bálido ku solamente nos mester ratifiká òf adaptá den nos leinan i hasi eksihente pa kada importadó tene su mes na dje manera kualke otro kompania ta hasi pa por importá produktonan na Merka òf Europa.
Nos lo bai traha riba normanan pa telefòn selular, pa ko’i hunga i sigur esun mas importante nos kuminda. Nos mester ta sigur i por konfia ku si nos kumpra un pan, un fruta, laga nos yu hunga ku un pòpchi òf si nos kumpra un telefòn inteligente di mas ku mil florin ku nos no ta kumprando algu falsifiká, kopiá òf traha di ingredientenan ku ta dañino pa nos salú. E konfiansa ei di konsumidó ta un garantia ku un gobièrnu mester duna su komunidat dor di pone reglanan kla i transparente pa kada komersiante tene su mes na dje. Protekshon di konsumidó mester kuminsá ku protehskon di produkto i servisio ku nos ta kumpra. I e temátika aki lo ta punto di lansa di Fundashon pa Konsumidó den 2017
Finalisando nos lo ke desea tur konsumidó di Korsou di parti di staf, personal i direktiva di Fundason pa Konsumidó, felis dianan di fiesta, bon Pasku i un tremendo kambio di aña. Felis 2017.
Marc Marshall
seguridat di produkto i servisio
Direktor