Konsumidó Alertá Volumen 29, Novèmber/Dezèmber 2016 | Page 13

leinan di konstrukshon

Generalmente, na momentu ku ta bai konstruí un kas, esun ku ta duna e tarea ta sera un kombenio ku un kontratista. E derecho i obligashonnan di e kombenio akí ta wòrdu reglá den buki 7 di nos Kódigo Sivil. Artíkulo 7:750 BW ta indiká ku tumamentu di trabou ta e kombenio kaminda un partido, e kontratista, ta mara su mes na e otro partido, e dunado di e tarea, pa hasi un trabou di naturalesa físiko kontra un pago. E kontrakto akí ta diferensiá su mes for di porehempel kombenio di labor of un kombenio pa hasi un servisio. Importante ta ku e kontratista tin e obligashon pa ehersé un labor di un karakter físiko.

Ora ta trata e kombenio entre e dunado di tarea i e kontratista ta prudente pa pone e intenshon di partidonan mas spesífiko posibel riba papel. No solamente esaki ta importante pasó ta trata un invershon finansiero grandi, pero tambe pa límita mal komprendementu despues. Awendia tin diferente kontraktnan general ku por wòrdu usa.

Sinembargo semper ta importante pa revisá kada deseo en partikular ku un abogado of hurista. Un punto importante ta pa determiná kua partido i tambe bou di kua kondishon ken ta resposabel pa imkomplimentu of defekto ku por sosede. Por indiká ku generalmente e kontratista ta responsabel pa e material ku wordu usá. Lei ta indiká ku konsekuensia di mal trabou dor ku defekto di e materialnan òf asesorio ku e kontratista a usa, ta bini pa responsabilidat di e kontratista. Tin konstrukshon kaminda partidonan ta palabrá ku

e dunado di tarea ta soru pa e material. Lei ta indiká ku den kaso ku e mal trabou ta konsekuensia di defekto di asuntunan ku a bini for di e dunado di trabou, bou di kua e tereno riba kua e trabou ta wòrdu hasí tambe ta forma parti, e ora ei e dunado di trabou ta responsabel. Por sosede ku e kontratista tabatin obligashon di avisá e dunado di tarea tokante e material òf por sosodé ku e kontratista no tabata profeshonal of kuidadoso sufisiente. Den un kaso asina e responsabilidat ta keda riba e kontratista. Mas aleu ta importante pa tene kuenta ku e kontratista tin derecho di aserká korte ku e petishon pa adaptá e preis pa e tarea den kaso ku despues ku a sera e kombenio sirkunstansianan a presentá ku tin afekto riba e preis i den kual no por tene e kontratista responsabel p’e of pa kual e kontratista no tabata tin nodi di tene kuenta kuné.

Tambe por sosede ku e dunado di tarea a duna e kontratista informashon robes kual informahson nesesario pa determiná e preis korekto. Den kasonan manera esnan anterior indiká, e kontratista por adapt’é of laga korte adapta e preis . Un punto mas importante ora ta trata adaptamentu di preis di e tarea ta ku e kontratista mester avisá e dunado di tarea mas rápido posibel tokante nesesidat pa adaptá e preis. Ta di sumo importansia ku e kontratista no por adapta e preis sin mas, osea e no por adaptá e preis sin avisá e dunado di e tarea previamente. E asina yamá obligashon di avisá ta konta hopi pisa. E kontratista mester avisá e dunado di tarea ku e kontratista tin plan di adaptá òf subi e preis pa asina e dunadó di tarea tin oportunidat di trese kambio òf hasi e kontrukshon mas simpel. Na momentu ku un kontratista ehersé e labor sin avisá previo ku e preis lo tin ku subi, esei por nifiká ku gastunan èkstra ku e kontratista tabatin, lo mester wòrdu kargá dor di e kontratista mes.

Un parti tambe di importansia ta e pregunta kiko lo mester hasi of ken ta responsabel na momentu ku tin defekto den e konstrukshon. E pregunta interesante akí lo haña atenshon den nos próksimo edishon.

Un kontribushon di mr. Sheldry Osepa