Konsumidó Alertá Volumen 28, Òktober 2016 | Page 6

REGULASHON

DI TRATO DI PASAHERO DOR DI

KOMPANIANAN DI AVIASHON

Fundashon pa Konsumidó último tempu a bin ta tuma nota di reklamo di konsumidónan tokante di mal servisio di Insel Air. Kehonan tokante di retraso, kanselashon sin previo aviso, falta di komunikashon, a kue forma struktural i no por kalifiká esakinan mas komo insidente. Hopi konsumidó ta sinti nan mes impotente sigur mirando e echo ku riba sierto rutanan no tin alternativa di kompania pa skohe for di dje pa hasi su biahe.

Un situashon alarmante i desesperante pa sierto biaheronan konserní i sigur preokupante pa konsumidónan ku tin pensá di buk un biahe ku Insel Air, ku te ainda komo ‘kompania responsabel’ no ta dunando su klientenan pagadó e rèspèt, bon trato i servisio ku nan meresé. Pa ku esaki Fundashon pa Konsumidó na promé lugá ta urgi Insel Air pa ta mas transparente den su manera di duna informashon i tambe evaluá i strukturá su buelonan di un forma ku ta kumpli ku normanan di aviashon internashonal.

REGULASHON

Pa evitá e tipo di situashonnan asin’aki ta importante pa Fundashon pa Konsumidó, pa yega na un solushon struktural. Fundashon pa Konsumidó ta di opinion ku a yega ora pa gobièrnu stipulá reglanan transparente pa atendé ku situashonnan di diskrepansia pa biaheronan. Nos mester yega na normanan fiho di kompensashon pa kada pasahero na momento ku un kompania di aviashon no kumpli ku loke a palabrá ku e konsumidó. Esaki basá riba normanan internashonal manera stipulá den e Tratado di Montreal.

E Tratado di Montreal a keda introdusí pa paisnan afiliá na International Civil Aviation Organization (ICAO) pa regulá i standarisá entre otro trato di kehonan di konsumidó. E tratado aki tin komo meta pa pone norma i stándarnan uniforme pa kompanianan di aviashon den transporte internashonal di pasahero. Importante den esaki ta ku a fiha responsabilidat di e kompania di aviashon pa ku su pasaheronan. E tres responsabilidatnan sentral di un kompania di aviashon den e tratado ta responsabilidat pa morto i leshonnan di kurpa, responsabilidat pa retraso i kanselashon di buelo i responsabilidat pa destrukshon, pèrdida i daño na ekipahe di e pasahero.

Fundashon pa Konsumidó lo bai aserká gobièrnu di Kòrsou ku un petishon pa traha riba normanan basá riba puntonan di e tratado aki. Konkretamente e petishon lo bai ta dirigí na Minister di Tráfiko, Transporte i Planifikashon Urbano pa, na nòmber di gobièrnu di Kòrsou, regla lo siguiente:

• ratifikashon di e Tratado di Montreal pa asina krea e kuadro uniforme ku normanan internashonal den kua e responsabilidat di kompanianan di aviashon na Kòrsou pa ku su pasaheronan ta keda fihá.

• bini ku normanan di kompensashon konkreto pa kompanianan di aviashon na Kòrsou tene nan mes na dje na momentu di morto òf leshonnan di e pasahero, na momentu di retraso òf kanselashon di buelo i na momentu di pèrdida òf daño na ekipahe di e pasahero.

Pa duna nos petishon mas peso Fundashon pa Konsumidó ta aktivando nos komunidat biahero pa asina nos logra e meta aki. Nos a pidi kada konsumidó ku ta pará tras di e petishon aki pa yena e formulario di petishon pa duna apoyo na e yamada aki. Nos mester di bo ayudo i sosten pa duna un base firme i masal na e denunsia aki. Por hasi esaki online via nos página di Facebook https://www.facebook.com/fundashonpakonsumido/ i tambe por pasa personal na nos ofisina pa firma e petishon.

Mas tantu firma nos haña, mas impreshon i efekto nos bos di konsumidó lo tin riba nos gobièrnu pa atendé ku e problema aki di un forma struktural. Pa mas informashon por subi nos wèpsait www.fundashonpakonsumido.org. I pa kualke pregunta, komentario òf sugerensia por tuma kontakto ku Fundashon pa Konsumidó na number di telefòn 462-666 òf via e-mail [email protected].