DEN CHIKÍ
Kon seguro ta konta balor al dia di un outo?
Si bo outo a ser deklará total loss, den mayoria kaso e sèn ku seguro ta pagabo no ta yega pa por kumpra un otro outo. Esaki ta resaltá den e hopi kehonan ku konstantemente nos Fundashon ta haña over di seguro.
Tur kos ta kuminsá i kai ku balor di outo. Aki Fundashon pa Konsumidó ta haña ta importante pa aksentuá ku mas bieu bo outo ta, ménos balor e tin. Aunke bo outo ta kore bon, bo ta mantené bon, ta service konstant, na final di dia, ta su añanan di eksistensha ta determiná su balor.
Pago den kaso di Total Loss
hopi biaha ta desepshonante.
Pa bo kalkulá balor al dia (dagwaarde) di un outo, seguronan ta apliká e siguiente fórmula:
E promé aña ta kanselá (schrijf af) 25% di e balor di kompra, di 2 aña ta kanselá 20%, di 3 aña ta kanselá 15% i di 4 aña òf mas ta kanselá 10%.
Pues si un outo kumprá na aña 2010 su balor di kompra tabata Fl. 40.000,00, awe 6 aña despues, su balor al dia (dagwaarde) ta m.o.m. fl. 14872,00.
E balor al dia di bo outo v/s e haltura di e daño (schade) ta determiná si bo outo ta wòrdu deklará total loss òf no.