Editorial
PRÓLOGO
Bon bini na e edishon speshal aki di nos revista Konsumidó Alertá. E edishon aki ta speshal ya ku e biaha aki no solamente nos ta saka nos vershon digital manera kasi tur luna pero tambe nos ta saka un vershon imprimí pa asina alkansá esnan ku no ta riba internèt òf no tin akseso na esaki. Pa esnan ku si tin akseso na internèt i ainda no ta aboná riba nos vershon digital di Konsumidó Alertá, nos ta hasi uzo di e oportunidat pa invitá bosnan pa hasi esaki.
Den e edishon aki nos ke pone atenshon na un yamada ku Fundashon pa Konsumidó a hasi na konsumidónan biahadó pa yena e petishon digital riba Facebook den kua nos ta boga pa gobièrnu stipulá un kuadro legal ku ta hasi kompanianan di aviashon responsabel na ora ku e kompania no kumpli ku e akuerdo ku e ta sera ku e pasahero, esta di hiba e pasahero i su ekipahe di un pais pa otro, sano i salvo. Fundashon pa Konsumidó lo dirigí un karta na gobièrnu di Kòrsou, huntu ku tur e firmanan rekoudá. Tambe nos ta dediká un artíkulo na derechinan ku konsumidónan rònt mundu tin komo pasahero.
Mas i mas nos ta mira ku konsumidónan ta bira mas konsiente di su ròl den e proseso di kumpra i bende. Meskos ku un kompania ta eksihí pago di su kuenta di koriente, awa òf internèt i ta kòrta konekshon i kobra but pa kada inkumplimentu di su kliente, asina tambe e konsumidó no tin masha kunes mas pa eskusanan ku kompanianan ta trese dilanti na momentu ku nan no por kumpli ku nan parti di e akuerdo. Si un konsumidó pèrdè trabou, bira malu i no por kumpli ku su parti di e akuerdo esaki tin konsekuensia pa e akuerdo. Asina tambe konsumidónan ta eksihí kumplimentu di e akuerdo di e kompania. I si esaki no por, konsumidónan konsiente no ta keda satisfecho ku un diskulpa i ta eksihí un kompensashon. Esaki ta un faktor nobo i determinante ku kompanianan mester kuminsá tene kuenta kuné i adaptá nan komportashon i trato pa ku nan kliente.
Mas aleu abo konsumidó por tuma nota di informashonnan balioso den rúbrikanan fiho di nos revista Konsumidó Alertá Digital, manera Den Chikí, Kompará i Kumpra, Bo Salú i Intermedio. Den e último rubrika aki atrobe nos lo tin un aporte di Caricert, nos tim de rèspòns di emergensia sibernétiko, ku ta parti integral di Bureau Telecommunicatie, Post & Utiliteiten.
Kòrda semper, si bo ke risibí un kopia di e revista aki tuma kontakto ku nos numbernan ya konosí. Nos lo sòru pa bo risibí un kopia di nos revista ku pòst. Pa esaki tambe bo por manda un e-mail pa [email protected] i nos lo manda bo un kopia. Tene na kuenta si ku kantidat ta limitá. Kòrda pone famia i amistatnan na altura di e edishon nobo di nos revista. Manda un mail pa aboná riba nos revista digital i risibí esaki riba bo kòmpiuter, tèblet òf telefòn smart sin hasi niun esfuerso.
Danki di antemano pa bo interes de nos revista!
Marc Marshall
KonSumidó tambe ta eksihí kompensashon pa inkumplimentu di kontrakt
Direktor