Kiko ta e kosnan ku mester tene kuenta kuné promé ku kumpra un kolchon?
Un kolchon nobo por ta un gastu grandi. P’esei ta hopi bon pa bo ta sigur den loke bo ta bai kumpra pa asina evitá di kumpra algu ku despues bo no ta satisfecho kuné.
Promé ku bo kumpra un kolchon, bo mester tin algun kos definí. Por ehèmpel:
- Ki tipo di kolchon bo ta buskando
Tin diferente tipo di kolchon di diferente material. Algun ta mas duru ku otro òf tin algun ku materialnan spesial den dje ku ta pone bo drumi mas konfortabel. Tin ku ta trahá spesial pa personanan ku ta sufri di lomba, garganta ets. Pues ta bon pa bo sa ki tipo di kolchon bo ta buskando ya asina bo ta hasi e proseso di kompra tambe mas fásil.
- E grandura di kolchon
Ounke hopi hende gusta espasio riba nan kama, ta bon pa bo analisá e grandura di bo kamber promé ku bo skohe grandura di bo kolchon òf kama. Un kolchon muchu grandi por tuma muchu espasio kual ta pone ku e espasio den bo kamber no ta sufisiente. Si ta bo so ta drumi, un kama di kasi 3 persona outomátikamente ta eksaheradamente grandi.
- Den ki rango di preis e kolchon ta
Naturalmente bo budget tambe ta bon pa analisá promé. Kompra di kolchon, no ta e kompra di mas barata. Pues pa e motibu aki ta bon pa bo sa delantá di e nesesidat di un kolchon i pa si bo no por saka e montante di sèn den un biaha, bo spar pa kumpra un bon kolchon.
-Si komo konsumidó bo tin pregunta
Naturalmente ta bon pa bo skibi bo preguntanan i hasi esakinan na e negoshante. Preguntanan manera:
- Si bo ta soda hopi, kua kolchon ta ideal pa bo?
- Si bo ta un hende ku ta sufri di doló di lomba, kiko
ta rekomendabel?
- Si bo ta un hende ku ta sufri di alergia, kua kolchon
lo ta mas mihó p’abo
- Puntra si bo por drumi i tèst e kalidat òf material di
e kolchon.
- Anto prinsipalmente kiko ta e kondishonnan
general.
Kòrda ku kolchon ta algu ku difísilmente bo por bende despues di uzo. Pues kompará bon promé ku bo hasi bo kompra. Si ta un marka spesífiko di kolchon bo ke? Bai tèst e marka en kestion pero no ekskluí e posibilidat di kumpra otro marka. Fundashon pa Konsumidó ta konsehá pa bai establesimentunan kaminda tin diferente marka optenibel ya asina bo por kompará kalidat muchu mas mihó.
KOMPARÁ I KUMPRA
UN BON
KOLCHON
POR DETERMINÁ BO FUNSHONAMENTU DURANTE DIA