E KASO SEGUN LEI I HURISPRUDENSIA
Korte di Apelashon di mes manera ku Korte den Prome Instansia, ta sali for di e punto di bista, ku si un kompania di seguro ta usa kondishonnan general kontra di e konsumidó, esakinan mester ta komprendibel i kla pa e konsumidó. Si esaki no ta asina, e kondishon general usá, mester keda interpretá na fabor di e konsumidó. Den apelashon e kompania di seguro ta trese pa dilanti, ku e echo ku e konsumidó a marka ‘no’ tras di e pregunta ku si tin hende bibá den e kas, no ta meskos ku deklará na e departamento di e kompania di seguro, ku e kas ta para bashí òf ku e kas no ta den uso komo bibienda, manera eksihí den e kondishonnan general.
Korte di Apelashon no ta di akuerdo ku e ponensia aki di e kompania di seguro, pa motibu ku pa Korte e kondishon general usá aki, no ta unu muchu komprendibel i kla pa e konsumidó. Si e konsumidó a yena riba e prome formulario ku no tin hende bibá den e kas, segun Korte, ta meskos ku si e bisa ku e kas ta para bashí òf ku e no ta ser usá pa bibienda. Korte mas a leu a konstatá tambe, ku prome ku e kandela, no tabatin intenshonnan konkreto di banda di e konsumidó-asegurado, pa basha e kas abou i lant’e di nobo, di manera ku e kompania mester paga e montante di mas haltu na e konsumidó. Tur esakinan a hiba Korte di Apelashon na duna e konsumidó-asegurado rason i ratifiká e veredikto di Korte den Prome Instansia.
KONKLUSHON
E veredikto interesante aki di Korte di Apelashon, ta mustra kompanianan di seguro, pero tambe otro kompanianan, e importansia di formulá kondishonnan general na un manera kla i komprendibel pa e konsumidó. E echo ku tabatin un trahadó di e kompania ku a yuda e konsumidó-asegurado yena e formulario di daño despues di e prome kandela, tabata ainda mas determinante den e kaso aki. E trahadó di seguro aki tabatin e obligashon di partisipá na e departamento konserní e loke e konsumidó a deklará na momentu di hasi petishon pa daño i perhuisio.
Artíkulo kortesia di abogado mr. Rainey Conquet