IMPOSIBEL
Lastu tempu Fundashon pa Konsumidó ta risibiendo bastante keho tokante outonan nobo ku ta duna konsumidónan doló di kabes. Outonan ku ta daña denter di algun luna despues di a keda kumprá, kondishonnan di kompra i garantia no transparente.
Si bo kumpra un outo i esaki a daña den e periodo di garantia, semper promé kos ku bo tin ku hasi ta mèldu e problema na e bendedó ku e petishon pa drecha e outo sin gastu òf remplasá e outo pa un otro.
Pa lei bo tin derechi riba reparashon grátis òf remplaso. Si esaki no ta posibel bo por kanselá e kompra i eksihí bo plaka bèk. Si e daño a keda okashoná dor di mal uso di parti di e kumpradó e garantia por kaduká pa e motibu aki. Den e periodo di garantia e bendedó ta responsabel pa saka afó si tabatin mal uso di parti di e kumpradó. E lo mester prueba esaki, si e ta alegá ku e konsumidó a usa e outo di un manera inkorekto.
PROBLEMA KU BO OUTO NOBO?
Otro problema ku sa surgí den kompra i benta di outo nobo ta ku e bendedó ta disidí di hisa preis di un outo ku un konsumidó a bestèl seka dje. Esaki por?
E kontesta ta NO! En prinsipio tur dos partido ta mará na e kombenio di kompra ku nan dos a sera, bou di e kondishonnan akordá. Kambio di preis por solamente den kasonan kaminda e bendedó ta pasa un subida di preis ku ta konsekuensia di (un kambio di) lei. Manera un subida di OB por ehèmpel.