Kampaña di informashon
Aqualectra ta lansa
Fundashon pa Konsumidó a tuma nota di un kampaña ku resientemente, nos kompania di awa i elektrisidat a lansa. Saliendo for echo ku nos tur ta hasi uzo di servisio òf produkto di Aqualectra, Fundashon pa Konsumidó ke brinda bo tur detaye di e kampaña aki pa bo keda bon informá.
E kampaña aki tin komo meta, konsientisá un i tur pa paga nan kuenta na tempu i asina evitá ku awa òf koriente ta keda kitá i ku por kousa malkontentu bou di nos konsumidónan.
Meskos ku Aqualectra, Fundashon pa Konsumidó ta kere firmemente ku tur hende mester por disfrutá di bida hasiendo uzo di awa i koriente. Esaki ta un di bo derechinan komo konsumidó. Pero tambe mester enfatisá ku e uzo di awa i koriente aki mester ta di un forma responsabel.
Den e último aña alrededor di 17% konsumidó a keda deskonektá mas ku 1 biaha òf mas for di ret di koriente i un porsentahe di 15% di konsumidónan pa parti di awa. Segun Aqualectra ta splika, nan a bini ta hasi tur loke ta na nan alkanse pa konsumidónan haña sa na tempu kiko su konsumo ta, kuantu e tin di paga anto kua ta posibilidatnan pa paga su kuenta na diferente punto rònt Kòrsou. Tambe Aqualectra a duna di konosé ku pa vários tempu kaba nan no ta kòrtá awa òf koriente riba djabièrnè mas pa evitá ku e kliente ta hañ’é den un situashon fèrfelu den fin di siman.
Pronto Aqualectra lo introdusí su wèpsait nobo, kaminda den tur trankilidat abo komo konsumidó por hasi uso di vários servisio inovativo na bo propio kas òf na kualkier parti di mundu kaminda bo ta. E wèpsait lo duna akseso tambe na e link yamá ‘Mi Kuenta’ kaminda bo por revisá i imprimí kuentanan al instante, evitando ku bo ta faya unu. Kada kliente ku suskribí via di. Di e forma bo por tin bo resibu na bo alkanse ki ora bo mester. Banda di esaki bo ta kontribuyendo na mes momentu na nos medio ambiente.