Danki pa lesa e edishon di e luna aki di e revista digital di Fundashon pa Konsumidó. E edishon aki atrobe ta yená ku informashon balioso pa abo konsumidó tuma nota di dje, eduká i hasi bo mes ainda mas konsiente di bo derechinan komo konsumidó. Nos ta ofresé bo un biaha mas un variedat di artíkulonan riba diferente tópiko interesante.
En bista di elekshon benidero, e rúbrika di Den Chikí, ta ofresé bo un artíkulo tokante kon ta kon konta ‘restzetel’ den nos sistema elektoral. Tambe un artíkulo ku tepnan balioso kon pa prepará pa e temporada di orkan benidero. Den e rúbrika di Notisia, nos ta trata e kampaña di informashon di Aqualectra pa informá konsumidónan tokante digitalisashon di su servisio di pago.
Rúbrika di keho, e luna aki ta trata problemanan di konsumidónan ku outonan nobo i kon pa aktuá si bo haña bo mes den un situashon similar. Tambe nos tin artíkulonan interesante tokante di publikashon di preis di krédito di konsumo i kondishonnan general den e sekshonnan di ‘Intermedio’ i ‘Drechi i Deber’. Manera semper den nos sekshon di ‘Kompará i Kumpra’ bo ta haña e komparashon di preis mensual di nos fundashon.
E luna aki nos a kompará preisnan den botikanan lokal. Tuma nota tambe di e artíkulo ku tepnan pa tene kuenta kune ora ta skohe e smart tv ku ta pas ku bo.
Nos ta sera nos revista ku e rúbrika di salú, ‘Bo Salú’, ku e luna aki ta dediká na e deporte tan popular di awendia, Crossfit, i riba nos kontraportada un artíkulo tokante e impakto di suku riba nos salú.
Mi ta spera ku e kompilashon di artíkulonan ta na bo interes. Tuma bo tempu i lesa kada artíkulo. Ta informashon di sumo importansia pa bo formashon komo konsumidó. Un petishon ta bai na kada unu pa kompartí e revista ku famia i amistat i apoyá mas konsumidó pa aboná riba nos revista pa mas konsumidó por risibí Konsumidó Alertá outomátikamente via mail. Semper nos ta habrí pa rekomendashonnan tokante di nos revista i tópikonan ku abo konsumidó lo ke mas informashon di dje i lo ke mira tratá den Konsumidó Alertá Digital.
MarcMarshall
Direktor Fundashon pa Konsumidóó
Editorial
PRÓLOGO
Marc Marshall
Direktor Fundashon pa Konsumidó
Bo Revista Digital