E impakto di suku riba nos salú
Kuantu suku nos tin ku usa den un dia? Suku refiná manera suku di kaña, corn syrup, brown rice syrup, no ta un nutriente esensial, ke men bo por biba mas salú si bo no usa nan. Suku ta un karbohidrato sin ningun nutriente manera vitamina òf mineral. P’esei suku ta wòrdu konsiderá komo un kaloria bashí.
Tur karbohidrato rafiná manera pasta no-integral, pan blanku, aros blanku, cornflakes, djusnan, cheps i tortiya blanku ta kambia bira suku durante e proseso di digestion.
Ki impakto suku tin riba e muchanan?
Suku ta pone ku ménos sanger ta fluhí bai na e lobulo frontal kaminda e mucha ta diserní bon for di malu. Muchanan ku ta usa hopi suku hopi biaha tin puntonan abou na skol i tin hopi problema ku mal komportashon. Suku rafiná ta pone ku e nivel di suku no ta keda stabil, esaki ta pone ku e humor di e mucha ta bira instabil ku ta kousa problemanan sikológiko i problema ku konsentrashon. Tambe suku ta oumentá e riesgo di malesanan digenerativo den futuro manera kanser, diabétis, artrítis, problema ku kurason i gordura.
Suku ta afektá e sistema di defensa ku ta pone ku e mucha por haña fèrkout i grip mas lihé.
Karbohidratonan kompleho manera fruta i bèrdura fresku, granonan, bonchi, nechi i simia ta proveé un fluho stabil di glucose na e mente.
Un desayuno di granonan manera papa quacker, granola, pan brùin ta yuda e mucha por tin mihó resultado na skol.
Suku ta impaktá e nivel di suku den sanger di tantu e mucha komo e adulto.
E nivel di suku den sanger ta hunga un ròl den kon nos ta sinti i funshoná. Ora ku nos ta konstantemente bou di stress, no ta drumi sufisiente, ta kome kuminda ku muchu suku òf ta keda sin kome desayuno òf falta otro kumindanan nos nivel di suku den sanger ta bai haltu haltu òf abou abou. Ora e nivel di suku den bo sanger ta muchu haltu bo por sinti gana di arohá, haña biramentu di kabes, bo no por mira bon, bo ta sinti bo mente brua i ta sinti bo mariá espesialmente ora bo tabata sinta òf drumi i bo lanta para.
Ora bo nivel di suku den sanger ta muchu abou bo por sinti sakudimentu di kurpa, sodamentu, batimentu di kurason muchu lihé, doló di kabes, hamber, sentido di debilidat, kansansio, ansiedat, bo ta iritabel, nèrvioso, bo no por drumi bon i ta haña problema ku konsentrashon i mariá. Suku por tin un efekto hopi negativo riba nos salú i hopi biaha nos no ta ni konsiente di esaki. Ta p’esei ta konsehabel pa baha man na suku i disfrutá di un mihó salú i mihó kalidat di bida.
Kortesia di: Sanatura Curacao