Konsumidó Alertá Volumen 27, Ougùstùs 2016 | Page 18

BO SALÚ

No ta un deporte, pero mas un estilo di bida

Lusi bon, sintibo mes bon, tin un bon alimentashon I hiba un estilo di bida saludabel, a bira e último trènt na moda mundialmente, ku a toka Kòrsou tambe. Dje tantu ei ku rònt di e “hype saludabel” aki a ser generá diferente tipo di ehersisio pa mantené e kurpa i mente saludabel.

Ta di e forma aki loke nos konosé komo “Crossfit” a hasi su entrada i a kue plasa formalmente ya ku e ta brinda su fanatikonan un sistema di training di forsa i kondishonamentu basá riba ehersisionan direkto ku ta wòrdu konstant variá i kualnan ta wòrdu realisá ku un intensidat haltu, kaminda ku diferente disiplina deportivo ta wòrdu inkorporá den un seri di ehersisio di forma intenso.

Un di e bentahanan di práktika crossfit ta ku bo ta desaroyá dies kapasidat físiko: resistensia kardio respiratorio, resistensia muskular, forsa, fleksibilidat, potensia, velosidat, kordinashon, liheresa, balansa i presishon ku ta yudabo den e aktividatnan diario i ta mehorá bo estado di salú físiko i mental.

E plan di training Crossfit normal ta konsistí di mas o menos 15 pa 20 minüt di kalentamentu, ku ta konsistí di gemnastiknan tipo kardio of moveshonnan funshonal. Por ta bulamentu di kabuya òf djis un tròt suave. Despues ta sigui e parti di ehersisio tékniko kaminda ta pone bon atenshon na un uso korekto di hisamentu di peso òf bara. Mesora ta sigui despues ku ehersisionan den seri basá riba mehoramentu di e 10 komponentenan físiko di e kurpa.

Mester resaltá ku Crossfit ta ofresé un plan di training ku ta varia kasi tur dia. E sistema di train aki a bira mundialmente asina popular ku e ta wòrdu práktika den parkenan òf kualke espasio na airu liber ku ta disponibel. Aki na Kòrsou tambe nos tin diferente sentronan kaminda ta duna lèsnan den crossfit. Algun di esnan mas konosí pa nos ta Crossfit 5 triple 9, Crossfit Willemstad, Elite Fitness.

Komo ku aki ta trata di entrenamentu di intensidat haltu, ta bon pa hasi esaki bou di guia di un entrenadó eksperto den e materia pa evitá sufri leshonnan muskular. Entrenadónan i dòkternan físiko ta strès konstant pa e praktikantenan di crossfit realisá un kalentamentu apropiá, kuminsá e trainingnan di forma suave i progresivamente oumentá intensidat di esaki. Tambe ta rekomendá pa no hasi e ehersisionan aki ku stoma bashí, bebe sufisiente awa i sòru pa tin yudansa di un instruktor médiko i supòrt di un bon entrenadó deportivo.

Skucha bo kurpa. Un deskanso ta mes importante ku bo entrenamentu.

Crossfit a konbertí su mes den un estilo di bida ku por ser praktiká pa grandi i chikí, ku amigu i famianan.