SKOHE BO 'TELEVISHON SABÍ' IDEAL
Kisas bo tin’e of kisas bo ta buskand’e. Un kos ta sigur, e proseso di kumpra bo televishon ideal no ta unu fásil. Antes e opshonnan tabata limitá i e diferensia entre televishonnan riba merkado tabata e marka i e modèl. Awendia tin un variedat grandi di opshon, marka, modèl i karakterístikanan di televishon ku ta hasi e eskoho di abo komo konsumidó muchu mas difísil. Pero aparte ku tin diferente eskoho, kua televishon ta esun ideal pa bo?
TAMAYO
E kontesta aki ta dependé naturalmente di abo komo konsumidó su propio deseo. Kisas un televishon grandi ta bo kos? òf tòg unu chikitu? E kontesta por dependé te asta di e struktura di bo sala, kamber òf kualke parti kaminda ta bai pone esaki. Si nos ta papia di grandura di televishon, abo mester analisá algun punto promé bo tuma e desishon di skohe e grandura di bo televishon. Resultadonan di investigashonnan a prueba ku e grandura ideal ta dependé di e distansia entre bo stul, sofa òf kama.
E distansia aki mester ta 3 bia e midi di e televishon. Pues imaginabo, si e distansia entre bo stul, sofa òf kama ta 3 meter largu, ta konsehabel pa wak un televishon di 40 inch (102 cm). Pues mas leu bo ke sinta for di e televishon, mas grandi e pantaya mester ta pa bo por wak televishon na un manera agradabel.
SMART TV
Teknologia no ta para ketu. Pa algun aña kaba nos a bin ta tende di Smart TV. Manera e nòmber mes ta bisa, e ta un televishon sabí. Un Smart TV ta brindabo diferente posibilidat ku kualke otro televishon komun i koriente no tin. Por ehèmpel bo por wak bo serie faborito riba e aplikashon asina popular Netflix, bo por te asta hur un pelíkula via bo smart Tv. Programanan ku bo no a alkansá wak, ku bo smart TV bo por wak nan bek, na e momentu ku bo ta desea. E televishon sabí aki ta funshoná adekuadamente via konekshon di internèt dor di kabel òf Wireless. Un Smart TV ta bini ku diferente aplikashon den dje. No ta tur Smart TV ta meskos, kual ta nifiká ku no ta tur ta kontené e mesun aplikashonnan. Den e último añanan ku a pasa a yega di sosodé ku sierto aplikashonnan a disparsé for di diferente Smart TV. Esaki sigur ta un desapunto paso komo Konsumidó bo ta kumpra un televishon sperando ku e lo funshoná optimalmente sin ku aplikashonnan mester bai pèrdí. Pues ta importante pa bo kompará promé bo kumpra un Smart TV.