BOTIKA
KOMPARASHON DI PREIS
Fundashon pa Konsumidó resientemente a anotá i kompará preis di produktonan ku mas ta wòrdu kumprá pa nos konsumidónan den e diferente botikanan aki na Kòrsou. Saliendo for di e punto di bista ku konsumidónan mester ta responsabel i konsiente di nan kompra, Fundashon pa Konsumidó su meta primordial pa ku su komparashonnan di preis ta, pa yuda e konsumidó den su proseso di hasi un eskoho konsiente.
FPK a bishitá 29 botika a keda bishitá den e periodo di 4 pa 8 di ougùstùs 2016. Durante di e bishita aki a anotá preis di un kantidat di 81 produkto, repartí den diferente kategoria. E kategorianan aki ta: awa pa higiena pa boka, pasta di djente, habon pa baña, djèl pa baña kuné, puiru, deodorante, toaya femenino, pomada, krema pa kurpa, shampo/’conditioner’, ‘relaxer’ pa kabei i pintura. A kontrolá tambe palitu pa limpia orea, katuna, ‘remover’ pa uña, ‘zalf’ pa kurpa, habon pa man, krema pa feita i tambe ‘splash lotion’.
Botika Groot Piscadera esun di mas barata.
Basá riba e resultado di e komparashon di preis, Botika Groot Piscadera a resultá e botika ku na momentu di e anotashon di preis tabatin mas produkto na un preis mas ekonómiko, kompará ku sobra botikanan. Botika Groot Piscadera tabatin un kantidat di 23 produkto na e mihó preis for di e 81 produktonan preselektá. E di dos botika ku preis mas ekonómiko a resultá botika Cerrito, ku un kantidat di 20 produkto. E di tres botika mas barata ta botika Novo, ku un kantidat di 17 produkto.
Botika mihó surtí
Pa loke ta surtido, botika Groot Piscadera a resultá esun mihó surtí ku un kantidat di 67 produkto di e 81 produktonan ku nos a preselektá. Botika Cerrito a posishoná su mes na di dos lugá ku 61 produkto i botika Mahaai i Zuikertuintje na di tres lugá ku 60 produkto.
Diferensia di preis
Fundashon pa Konsumidó a konstatá un diferensia di preis notabel entre algun produkto. Por ehèmpel un bòter di shampo Motion Neutralizing ta kosta fl. 9.54 na botika Rio Canario i na botika Popular esaki ta kosta fl. 22.63, kual ta un diferensia di preis di fl. 13.09.Gel/mouse pa feita di e marka Nivea for men di 200ml ta kosta fl. 5.95 na botika De Savaan i na botika Popular e ta kosa fl. 14.35.
Asina tin un kantidat mas di diferensianan den preis, prinsipalmente debí ku aki ta trata produktonan ku no ta mará na un preis máksimo stipulá dor di Gobièrnu. Netamente pa e motibu aki Fundashon pa Konsumidó ke enkurashá nos konsumidónan pa evaluá preisnan bon di forma ku nan por hasi kompra konsiente i responsabel.Tene na kuenta ku botikanan tambe sa tin huki ku produktonan den oferta, kual tambe por influensia preisnan.
Pa mas informashon tokante di komparashon di preis di produktonan di botika i otro informashon relashoná ku derechinan di konsumidó por bishitá nos wèpsait www.fundashonpakonsumido.org òf bèl nos na 462-6666.