Ora ku konstatá ku un kondishon general usá kontra di e konsumidó ta ekskluí responsabilidat di e komersiante di manera inhustu òf ku e kondishon ta unu no rasonabel pa e konsumidó, por pidi Korte pa destruí òf deklará esaki nulo. Wes e ora ei ta husga i wak a base di e dos listanan ariba menshoná, si e kondishon ta hustu i/òf rasonabel òf nò. Si a base di e listanan Korte konstatá ku e kondishon general ku a keda usá, ta unu inhustu, esaki por keda destruí.
Mester bisa finalmente, ku ta di sumo importansia pa e konsumidó tuma bon nota di kondishonnan general ku ta keda usá, na momentu di sera un akuerdo. E komersiante ku ta usa kondishonnan general mester pone e konsumidó na altura di e kondishonnan aki, si no mas despues e no por usa nan kontra di e konsumidó. Ora komo konsumidó bo konstatá ku e kondishon general ta unu kontra di e lokual ta stipulá den e listanan ariba menshoná, entregá un petishon na Korte pa destruí òf deklará e kondishon general inválido.
Artíkulo kortesia di abogado Mr. Rainey Conquet