DERECHI I DEBER
inhustu por keda destruí den Korte
KONDISHONNAN
GENERAL
Un akuerdo di kompra ta keda será na momentu ku e konsumidó bai di akuerdo ku un oferta hasí pa e komersiante. Komo konsumidó diariamente bo ta sera hopi tipo di akuerdo di kompra, manera kompra di gasolin na un pòmp, kompra di un ticket pa biaha òf kompra di artíkulonan pa skol. Asina’ki tin masha hopi sorto di akuerdo di kompra ku por ser menshoná. Loke ku hopi konsumidó no ta konsiente di dje, ta ku práktikamente tur akuerdo ku keda será ta mará na kondishonnan general. Esakinan por wòrdu kompará ku e ‘lèternan chikitu’ den un pólisa di seguro.
E kondishonnan general aki ta keda usá pa e komersiante òf e usadó di kondishonnan general pa minimalisá òf asta ekskluí responsabilidat pa daño i/òf pèrdida ku e konsumidó di un òf otro manera por a sufri a base di e akuerdo di kompra. Un ehèmpel konkreto di kondishonnan general ku e komersiante sa usa ta ‘kambio di artíkulo mester tuma lugá denter di 8 dia ku bo bòn ’ òf den kaso di provedornan di internèt i/òf telefòn por ta ‘paro di e akuerdo mester tuma lugá por eskrito ’. Mester enfatisá, ku hopi biaha e kondishonnan general ku e komersiante ta usa, no ta bini huntu ku e akuerdo mes.
E komersiante tin si e obligashon, sea di mustra e konsumidó riba eksistensia di e kondishonnan general òf dun’e un kopia di esakinan na momentu di sera e akuerdo. Si e komersiante no hasi esaki, e lo no por usa nan mas kontra di e konsumidó. Si e konsumidó di su banda, wòrdu mustrá riba e kondishonnan general ku e komersiante ta usa i e keda sin tuma nota di esakinan, esei ta keda pa su responsabilidat, si e kondishonnan general wòrdu usá kontra di dje. E no por bisa ku e no sa di nan.
No ta tur biaha esun ku ta usa kondishonnan general kontra e konsumidó por hasi esaki ku éksito. Hopi usadó di kondishonnan general tin e tendensia di pone komo kondishon general algu manera ‘nos no ta responsabel pa niun tipo di daño ku e konsumidó sufri ’. Di e manera aki komersiante, ta purba libra su mes di responsabilidat na momentu ku e konsumidó sufri un ke otro daño òf pèrdida. Un klóusula manera esun ariba menshoná ta unu ku pa lei ta inhustu pa e konsumidó. Den lei tin dos lista ku ta husga kondishon general usá den un akuerdo. Esakinan por ser hañá den buki 6 di nos Kódigo Sivil. Nan ta e asina yamá lista pretu i lista shinishi.