Konsumidó Alertá Volumen 26, yüli 2016 | Page 7

NOTISIA

FMS ta konsiente ku mester traha riba konsientisashon di e studiantenan aki pa ku e importansia di kuida nan bukinan. No solamente na komienso di aña eskolar so kaminda ta pidi e hóbennan pa kumpra un bon tas i kuida nan buki nan, pero tambe durante di henter e aña eskolar. Hóbennan mester ta konsiente ku pueblo ta invirtiendo den nan futuro i ku un oportunidat asin’aki no mester wòrdu desperdisio.

Mayornan tin un ròl hopi importante den e proseso di desaroyo di nan yu. Ta konsehabel pa mayornan ta mas aktivo den e proseso aki. Puntra i wak kon ta bayendo ku bo yu na skol, motivá i stimulá nan tur dia di nobo pa nan por tin ánimo pa sigui perseverá. Un mayor konsiente ta fungi komo e base pa un yu responsabel den nos komunidat. Skolnan avansá tambe por duna un man den e proseso aki dor di keda rekordá e hóbennan aki durante di aña pa kuida nan bukinan i no skibi òf hasi anotashon den nan.

Enseñansa Liber, e inisiativa di gobièrnu di Kòrsou bou di ehekutashon di Fundashon Material pa Skol ta fia abo komo studiante bukinan di skol i ta spera ku bo ta paga esakinan bek ku bo responsabilidat dor di kuida nan i tene nan den bon estado. Tuma tempu i apsorbé tur loke presente tin pa siña bu i pa mañan bo apliká e siñansa aki den bo futuro i di Pais Kòrsou.

“Hóbennan, bosnan ta hañando un oportunidat di oro. Tin buki na bo disponibilidat, kue esaki tene duru, hasi bo bèst i desaroyá bo mes pa den futuro bo por yuda bo Pais desaroyá”