INTERMEDIO
Awó ku ta komprendibel ku ta e tres yunan “legal” so ta heredá, tin ku enfoká kon ta bin na remarke pa e flètnan, e sèn na ACU i e sèn di hür. Lei ta ofresé nan tres opshon: aseptá e herensia zùiver, ninga e herensia, òf aseptá e herensia “ benificiar”.
Babymama nr. 1 a konsehá su yu hòmber di 18 aña pa aseptá e herensia “zùiver”; pero e yu tin ku pone bon tinu, paso esei kemen ku e ta responsabel pa 1/3 parti di tur e debenan ku Chamon Nicolaas a bai laga atras. Si su 1/3 parti den e biennan di e herensia no ta sufisiente pa kubri ku e gastunan e tin ku hinka man den propio saku pa paga e debenan ku a keda habri. Ta un situashon un tiki fèrfelu ya komo na momentu di fayesimentu hopi biaha e herederonan no sa eksaktamente ta kua i kuantu debe e defuntu a bai laga tras.
Babymama nr.2 ta obligá di aseptá e herensia “ beneficiar”, ya komo lei ta stipulá ku un mama (òf un otro representante legal) tin ku hasi esaki na momentu ku e yu ta menor di edat. E aseptashon tin ku wòrdu hasi na Korte di Hustisia. E konsekuensia di e akto aki ta ku e yu menor di edat hamas por keda responsabel pa e debenan di Chamon Nicolaas, na momentu ku esakinan surpasá e balor di e biennan di su herensia. Pa efektuá e aseptashon aki tin ku pasa dor di un trayekto basta intensivo ku yama “ vereffening” i ku ta parse e proseso di un faillisement. Ta bon pa remarká ku e posibilidat aki ta habri pa tur heredero, no solamente pa e menor di edat so.
E di tres opshon, kual ningun babymama a opta pe, ta rechaso di e herensia. Esaki tambe tin ku sosodé na Korte di Hustisia.
Si nos suponé ku tur e yunan ta mayor di edat i aseptá e herensia zùiver ainda nan no ta kla.
Nan lo tin ku buska un “verklaring van erfrecht” serka un notario. E notario ta kontrolá si en bèrdat Chamon Nicolaas a fayesé sin tèstamènt i si en bèrdat e tres yunan ta su yunan legal.
Ora e kaba di kontrolá e datonan aki e ta entregá na e herederonan e verklaring den kual tin pará ta ken ta e herederonan di Chamon Nicolaas i pa kuantu parti. Ku e verklaring aki huntu nan por bai ACU pa lanta e sèn di spar. Ya komo den bida diario ta difísil pa tur heredero kana e kamindanan huntu, ta usual ku un òf mas ta duna un otro “ volmacht” òf poder pa por representá nan.
Despues ku a lanta e sèn, no tin ku lubidá di paga e debenan! Despues di paga debe, loke sobra por wòrdu parti den tres. E tres yunan, komo herederonan di Chamon Nicolaas, ta obligá di kumpli ku tur e debernan ku e tabatin na bida. Pues, nan lo tin ku keda mantené e flètnan, paga erfpacht, grondbelasting, i kumpli ku sobra obligashon.
Hopi bia e obligashonnan ta un fuente di diskushon i problema entre nan. Ta bon pa menshoná, ku desde aña 2012 e ròl di Zoro di e yunan a yega su final. Kaminda promé kada yu tabatin derechi riba su parti den e herensia di su mayornan (legitieme portie), awó ta posibel pa deshereda un yu kompletamente. Ningun yu no tin derechi riba e herensia di su mayornan mas.
Pa tur e bon yunan di Kòrsou e aviso pa no neglishá mamai i papai, i pasa bishita nan tur djadumingu, paso boso lugá na e mesa di partishon ya no ta sigurá.