Un kontribushon di
Derechi di
Herensia
Den su afan pa splika mas mihó posibel derechinan di yunan riba partishon di herensha, mr. Mary -Ellen Ricardo, kandadiaat notaris ta publiká di un forma fásil i komprendibel, kiko kada lei ta nifiká. Ku su pèrmit Fundashon pa Konsumidó den edishon di e luna aki ta kompartí un di e artíkulonan aki.
Boeboe Fiel ta konsiderá su mes un bon yu di Kòrsou. E ta mantené su kas den sublime estado, i tur mainta ku ánimo e ta kue rumbo pa su trabou. Ya pa 24 aña kaba e ta infelismente kasá ku Nora Fiel, kende no ke laga su otro mitar bai pa nada di mundu. De bes en kuando Boeboe Fiel ta duna Nora Fiel sèn pa kumpra kuminda pa nan 11 yunan. Sobra Boeboe ta gasta riba su outo, alkohòl, fiesta i su pida kos na banda, Karmensita. Un djadumingu atardi durante nan wega semanal di dominó, Boeboe Fiel a kue un pleitu pisa ku Chamon Nicolaas, ya komo e la deskubrí ku mientrastantu ku e tabata sende lus na kaya, Chamon Nicolaas a pega kandela na kas.
Den su furia, Boeboe Fiel a saka un arma di kandela i tira Chamon Nicolaas mata. Chamon Nicolaas no tabata kasa, pero si e tabatin 4 yu ku kuater diferente “babymama”, di kual tres yu tabata rekonosé dor di Chamon Nicolaas. Chamon Nicolaas tabatin ademas diferente flèt ta hür i un suma signifikante di spar na ACU. E “babymama” nan tambe ta konsiderá nan mes un bon yu di Kòrsou, paso den trahe di luto ya kaba nan ta kla pa tuma enkargo di e sumanan di spar i hür ku Chamon Nicolaas a laga atras. Den nan ansiedat pa haña akseso na e sumanan ya menshoná, nan a aserka mi ku e siguiente pregunta: Ken ta esunnan ku tin derechi riba e biennan di Chamon Nicolaas, awó ku e la fayesé? Chamon Nicolaas keriendo ku e ta biba pa semper, a fayesé sin traha un tèstamènt.
“Erfrecht” ta e konhunto di leinan ku ta regla e traspaso di tur e derechinan, biennan i debenan di un defuntu pa su herederonan. Den aña 2012 vários kambio di gran importansia a tuma lugá den nos erfrecht, i pa e motibu ei, e siguiente 8 simannan binidero mi ta bai splika kiko e kambionan aki ta enserá i ki efekto e kambionan aki tin pa nos den nos bida komun.
Lei ta stipulá ku e kasa i e yunan ta e proménan ku ta bin na remarke pa heredá di e defuntu ora esaki fayesé sin traha un tèstamènt. Si e defuntu no tabatin ni kasa ni yu, lei ta yama e siguiente miembro di famianan den un sierto rango, (te "zesde graad") pa heredá.
Chamon Nicolaas no tabata kasá, dus ta su yunan so lo heredá, por igual parti, esei kemèn nan tur ta haña 1/3 parti di tur loke Chamon Nicolaas a bai laga atras. Kòrda: yu den erfrecht ta e yu rekonosé dor di e defuntu, e yu ku a nasé den matrimonio, e yu adoptá, òf e yu di kual hues a dikta ku e defuntu ta su tata. E yu “pafó” di matrimonio òf e yu ku no a wòrdu rekonosé no ta heredá! Den e kaso aki ta tres yu so ta heredá. Babymama nr. 4 lo hasi bon di bai hues pura i entrega un petishon pa: “gerechtelijke vaststelling van het vaderschap”, ya su yu tambe por toka parti den e herensia.