MANDA BO PREGUNTA,
NOS LO KONTESTÁ!
Regularmente Fundashon pa Konsumidó ta haña pregunta serka konsumidónan tokante di nan derechi i deber na momentu di sera un kontrato pa haña un produkto òf servisio serka un komersiante. E biaha aki nos ta trata e siguiente pregunta di un konsumidó: Ta ken tin ku paga e provishon di makelar (makerlaarscourtage) ora bo hür un apartamentu?
Kaso:
Un pareha buskando un bibienda pa hür, a buska riba diferente wèpsait di makelar i a mira un kas mashá interesante. Despues di a tuma kontakto ku e makelar, a resultá ku nèt e kas ei a wòrdu di hür. Pero si nan a indiká mas o ménos kiko nan ta buska na e makelar, pa e por yuda nan buska. Mesora e makelar a indiká ku den e kategoria ku nan ta buska, tin un kas mas asina riba e wèpsait.
Seguidamente nan a traha un afsprak pa wak e kas, nan a palabrá fecha pa drenta e kas i pa ki dia lo por firma e kontrakt di hür, kaminda e hürdó tin ku paga 3 kos, kual ta: un luna di hür ANG 950, un luna di bòrg i e makelar su trabou kual ta na balor di un luna di bòrg, pa asina nan por haña hür e kas. E pareha, sorprendé pa e montante ku nan tin ku paga, a disidí di tuma kontakto ku Fundashon pa Konsumidó pa verifiká si esaki ta korekto.
Artíkulo 7:417 insiso 4 di nos Kódigo Sivil
E doñonan di e kas a sera un akuerdo ku un makelar kaminda nan ta duna e makelar un tarea/trabou pa buska un hürdó pa nan kas. Dor di e akuerdo aki, e makelar ta buta e kas riba su wèpsait i hasi publikashon nesesario pa por haña un persona konforme buki 7 di nos Kódigo Sivil.
Meskos ta konta pa un buskadó di kas pa hür ku aserká un makelar pa buska un kas p’e. Si resultá, manera den e kaso aki ku e makelar ta trahando bon mirá pa tur dos partido, pues tantu pa e hürdó i pa esun ku ke hür su kas, artíkulo 7:417 insiso 4 nos Kódigo Sivil ta indiká ku si e hürdó ta un persona privá ku no ta aktua den funshon di kompania ta trata di un “zelfstandige woning” e makelar na promé instante no tin derechi di kobra e hürdó provishon di makelar. (Esaki ta wòrdu konfirmá tambe den un kaso similar den korte, fechá 26 mei 2014, zaaknummer 66028/2013).
Dikon un persona ku ke hür su bibienda lo bai un makelar?
1. Un makelar ku ta bai purba hür bo kas pa bo, por
konsehá bo tokante di preis di hür, suponiendo ku
e makelar tin e konosementu i eksperensia den e
merkado.
2. Tambe e makelar por sòru pa presentashon di bo
kas riba merkado, por ehèmpel but’é riba wèpsait
òf den foyetonan.
3. Un makelar por yuda e persona ku ke hür su kas
pa buska un hürdó konfiabel.
4. Un makelar ta tuma na su enkargo e parti hurídiko
di un akuerdo di hür, kaminda ta stipulá bo deber i
derechi i tambe di e hürdó.
5. Ora e makelar logra haña un posibel hürdó, e
makelar por regla e parti pa bai wak e kas huntu
ku e posibel hürdó.
6. Si logra yega na sera un akuerdo, makelar lo sòru
pa e promé pago di bòrg i hür wòrdu hasí dor di e
hürdó, tambe pa dunamentu di yabi i “check in”
den e bibienda.
7. Tambe ta posibel pa makelar por keda e persona
di kontakto pa siguí risibí pago i tambe pa ora tin
ku hasi reparashonnan na e bibienda i finalmente
pa ora e hürdó ke sali for di e bibienda.
Pa mas informashon semper por aserká otro makelarnan i wak serka kua abo komo persona ku ta bai hür su bibienda ta sinti konfortabel kuné.
Tuma nota! E artíkulo aki no ta limitá na hür so, e ta konta pa bendementu di kas tambe.