NOTISIA
Consumers International, e organisashon madre di tur organisashon pa konsumidó na mundu, a lansa un kampaña riba media sosial usando e título #JunkFoodGames pa hala atenshon riba e nesesidat pa un akshon mundial pa protekshon i promoshon di dietanan saludabel. E kampaña aki a wòrdu lansá den kuadro di e Weganan Olímpiko ku lo tuma lugá na luna di ougùstùs di e aña aki i tambe e Torneo di Futbòl Europeo ku a kuminsá dia 10 di yüni último.
Consumers International a bini ku e kampaña mirando ku e eventonan deportivo internashonal aki ta atraé invershonnan kuantioso pa loke ta trata promoshon di kompanianan mundial renombrá. Consumers International ta referí spesífikamente na kuminda i bebida no saludabel. Por ehèmpel durante Kopa Mundial di Futbòl na 2014 a kalkulá un invershon di mas o ménos 2.3 bion dòler na propaganda. Consumers International ta mira ku tipo di promoshonnan asina aki por tin impakto grandi riba sosiedat debí na e públiko inmenso ku ta sintonisá e eventonan aki.
Direktor general di Consumers International, sra. Amanda Long, a bisa ku hasi uso di deporte i selebridatnan públiko pa bende kuminda i bibida no saludabel tin un impakto negativo riba komementu di muchanan. Segun sra. Long, loke ta hasi e situashon mas pió ta ku kompanianan ta usa deporte pa promové nan produktonan no saludabel, pasobra dor di asosiá e produktonan ku deporte nan ta krea un impreshon ku e produktonan por ta saludabel.
Organisashon Mundial di Salubridat i Consumers International ta urgi gobièrnunan nashonal pa introdusí medidanan pa prevení i redusí propaganda di produktonan di kuminda i bibida no saludabel. Organisashon Mundial di salubridat ta pronostiká si sigui den e direkshon ku ta bayendo na 2025 lo tin 70 mion mucha ku sobrepeso òf obesidat.
Consumers International, komo un organisashon ku ta mira pa bienestar di konsumidónan rònt mundu ta kampañando pa un konvenshon mundial pa protehá i promové kuminda saludabel. Pa e kampaña aki Consumers International ta kolektando ehèmpel di propagandanan ku ta promové kuminda i bibida no alkohóliko ku un nivel haltu di vèt, salu i suku durante torneo di futbòl europeo i weganan olímpiko pa publiká esakinan riba Twitter i Facebook kompañá pa #theJunkFoodGames.
KAMPAÑA
CONSUMER'S INTERNATIONAL