Konsumidó Alertá Volumen 25, yüni 2016 | Page 20

Keda lantá te lat no solamente ta laga bo sinti bo kabes pisá i fofo e siguiente dia, drumimentu lat anochi ademas ta pone ku bo ta haña gana di kome kumindanan ku hopi vèt i haltu na kaloria ku resultado ku bo ta subi di peso. E universidat di Pennsylvania Perelman School of Medicine a hasi e siguiente estudio. Nan a skohe un grupo di persona, 27 tabata drumi pa mas lat 10or di anochi i e sobra 198 tabata drumi banda di 4or mardugá. Nan a deskubrí ku e grupo ku tabata drumi mas lat, tabata kome 550 kaloria mas tantu ku esnan ku tabata drumi 10or anochi. Despues di 5 anochi tras di otro sin drumi sufisiente e partisipantenan a subi mas di 1 kilo. Kome anochi tin diferente konsekuensia. Mas lat bo keda lanta mas tempu bo tin pa kome. Pèrdè soño tambe ta oumentá e gana pa kome kuminda haltu na vèt i kaloria. E abilidat pa disidí tambe ta mengua durante oranan lat di anochi ku ta hasié mas difísil pa bisa no na e gana di kome kuminda ku hopi vèt. Durante oranan di anochi e hormona yama “seretonin” ku ta duna nos e sensashon di ta kontentu ta baha i hopi biaha hende ta kuminsá kome mas pa haña e sensashon di kontentu bèk. Kome anochi tin efektonan negativo riba nos kurpa manera indigestion i kimamentu di stoma i problema ku kurason.

Sugerensia pa evitá komementu anochi

Kome un bon desayuno

Estudionan a mustra ku falta kumindanan durante di dia, espesialmente desayuno ta oumentá e deseo pa kumindanan haltu na vèt i kaloria durante di oranan di anochi. Bebe shake, kome webu, berdura i fruta den bo desayuno ta mantené bo mas yen durante di e dia dor di e nutrishon haltu ku nan kontené. Kome bon durante dia ta evitá ku bo kurpa ta sinti nesesidat di kuminda den oranan lat di anochi. Evitá di tin kumindanan haltu na vèt i kaloria na kas. E echo di no tin “junk food” na bo alkanse ora bo haña hamber anochi ta pone ku bo no por kom’é. Yena bo kushina ku kumindanan ku ménos vèt i kaloria manera yògùrt ku tiki vèt, fruta fresku i berdura. No sinta kome dilanti di televishon. Sinta na mesa i tuma tempu pa kou bo kuminda. Mas tempu bo tuma pa kome bo kuminda mas largu e sensashon di yen lo dura.

Bebe sufisiente awa

Bebe mínimo 8 glas di awa durante di dia. Keda hidratá lo baha e gana di kome pa loko. Si bo sinti hamber anochi bebe un te di yerba òf te sin kafeina. No solamente e lo mantené bo hidratá pero tambe lo remplasá e kumindanan haltu na vèt i kaloria.

Kontrolá bo emoshonnan

Hopi bia emoshonnan ta subi anochi i hopi hende ta kuminsá kome pa kita e sensashon di soledat, laf i infelisidat. Nos tin ku saka afó si nos tin hamber físiko òf emoshonal. Tuma tempu durante dia i dil ku e motibu real di e situashon ku ta hiba bo na kome mas tantu durante oranan di anochi.

Drumi na tempu

Mas ora di soño lo laga bo sinti bo mes ku mas energia. Mas tempran bo drumi ménos chèns bo tin pa sinti hamber. Nos hormonanan di hamber i satisfakshon ta dependé di nos ritmo di bida pa mantené nan balansá. Ora ku nos drumimentu ta for di balansa nos hormonanan di hamber i satisfakshon tambe ta desbalansá. E mihó solushon ta di drumi tempran i asina gosa di bo soño.

Kortesia di: Sanatura Curaçao

Vivian Allee

Cel:671-3175

Drumi lat

por laga bo kome mas tantu?!